राख संवाददाता
झुम्का,श्रावण १५ । बालबालिकामा हुने दादुरा–रुबेला रोग बिरुद्ध रामधुनी नगरमा खोप संचालन गर्ने भएको छ । नेपाल रेडक्रस सोसाइटी सुनसरी जिल्ला शाखाको आयोजनामा रामधुनी नगरपालिकाको समन्वयमा पालिका स्तरीय अभिमुखीकरण गर्दै श्रावण २२ देखि २६गते सम्म खोप अभियान संचालन गर्ने जनाएको हो ।
दादुरा–रुबेला प्रकोप नियन्त्रण रोकथाम र व्यवस्थापनको लागि पालिका स्तरीय अभिमुखीकरण तथा गोष्ठीमा खोप गुणस्तरीय तथा सुरक्षित तवरले लगाउँन नगरप्रमुख शंकरलाल चौधरीले सुुझाव ब्यक्त गर्नुभयो । बालबालिकामा लगाउँने औषधीमा कुनै गुनासाहरु आउन नदिन स्वास्थ्य शाखा चासोका साथ लाग्न निर्दैशन समेत दिनुुभयो ।
रामधुनी नगरमा १४ हजार जना बाबालिकामा खोप लगाउँने अभियान लिएको रामधुनी स्वास्थ्य शाखाले जनाएको छ । खोप प्रभावकारीताका लागि श्रावण १८ गते वडा स्तरीय अभिमुखिकरण समेत गर्ने भएको छ ।
दादुरा–रुबेला रोग बिरुद्धको खोप ६ महिना देखि १५ बर्षको उमेरका बालबालिकाहरुलाई लगाउँने छन् । खोप अभियान खोप केन्द्रहरुबाट संचालन गर्ने जानकारी दिएको छ । खोप केन्द्र सामुदायिक तथा संस्थागत बिद्यालयमै राखेर सेवा दिने जनाएको छ । खोप सेवा प्रवाहका लागि अभियानको अन्तिम दिन स्वास्थ्य चौकीबाट समेत संचालन गर्ने रामधुनी नगर स्वास्थ्य शाखा प्रमुख नगेन्द्र पौडेलले जानकारी दिए ।
दादुरा अति छिटो सर्ने संक्रामक रोग हो, जुन मिजल्स भाईरसको कारणबाट हुन्छ । रुबेला पनि भाइरस (रुवेला भाईरस) कै कारणवाट हुने दादुरा जस्तै देखिने संक्रामक रोग हो । यो रोग श्वास प्रश्वासको माध्यमबाट सर्दछ । दादुराले शरीरको बाहिरी छाला र भित्री पत्रहरूमा संक्रमण गर्छ जुन फोक्सो, आन्द्रा, भुँडी, आँखा, मुख र घाँटीमा रहेको हुन्छ । दादुराका भाइरसले दादुरा लागेको बेला शरीरको रोग प्रतिरोधात्मक क्षमता शक्तिलाई हप्तौंसम्म क्षति पुर्याइदिन्छ ।
यो रोग कुनै पनि उमेरका मानिसलाई र विशेष गरी ५ वर्ष मुनिका बालबालिकामा धेरै लाग्दछ र छिट्टै महामारीको रुप पनि लिन सक्ने नेपाल रेडक्रस सोसाइटी सुनसरी जिल्ला शाखाका रविन घिमिरेले जानकारी दिए ।
गोष्ठीमा कार्यपालिका सदस्य, वडाअध्यक्ष, स्वास्थ्य कर्मी, सामुदायिक बिद्यालय व्यवस्थापन समितिका अध्यक्ष, प्याबसन रामधुनी नगर समिति, शिक्षक लगायतका अभियान कर्ताहरुको सहभागीता रहेको थियो ।
यस रोगको लक्षणमा उच्च ज्वरो आउने र शरीरमा राता बिबिरा देखिने, आँखा रातो हुने, रुघाखोकी लाग्ने, संक्रमितको सम्पर्कमा आए १०–१२ दिनपछि मात्र दादुराको लक्षण (ज्वरो) देखा पर्छ भने १२ देखि २३ दिनपछि रुबेलाको लक्षण देखा पर्छ ।
यो रोग लागेमा झाडापखाला लाग्ने, कुपोषण हुने, कान पाक्ने, श्वासप्रश्वासको कडा संक्रमण (निमोनिया) हुने , आँखामा समस्या भई अन्धोपन हुने, मस्तिष्कमा कडा खालको सुजन हुने वा मस्तिष्क ज्वरो आउने, कम्पन हुनेजस्ता जटिलताका कारण मृत्यु पनि हुने सक्ने सम्भावना हुन्छ ।
