रामधुनी खबर संवाददाता
झुम्का, असोज २७ । रामधुनी – ४ इक्राही खेल मैदानमा प्रथम न्यू रामधुनी च्यालेन्ज कप फुटबल प्रतियोगिता खेलका लागि सम्पूर्ण तयारी पुरा भएको छ । असोज २८ गते मंगलवार देखि सुरु हुने प्रतियोगिताका लागि तयारी पुरा भएको आयोजक न्यु रामधुनी फुटबल क्लवका अध्यक्ष गंगाराम माझीले जानकारी दिनुभयो ।
स्वास्थ्यका लागि खेलकुद, राष्ट्रका लागि खेलकुदको नारा सहित मंगलवार दिउँशो २ः३० बजे देखि समुद्धघाटन खेल सुरु हुनेछन् । समुद्धघाटन खेलमा सुन्दर दुलारी फुटबल क्लव मोरङ्ग भर्सेज चतरा फुटबल क्लव सुनसरी विच हुने छन् ।

प्रतियोगितामा आठ टिम सहभागी छन् । सुन्दर दुलारी फुटबल क्लव मोरङ्ग, चतरा फुटबल क्लव सुनसरी, राजावास फुटबल क्लव सुनसरी, पंचायन फुटबल क्लव सुनसरी, न्यु रामधुनी फुटबल क्लव आयोजक, प्रकाशपुर फुटबल क्लव सुनसरी, इन्द्रेनी फुटबल क्लव कालाबन्जर सुनसरी र सान नेपाल प्रा.ली. इटहरी सुनसरीले सहभागी जनाएका छन् ।
रामधुनी मन्दिरको पहिचान, धार्मिक पर्यटन नगर विकास, युवाहरुमा खेलकुद विकासगरी युवाहरुमा दुव्र्यसनी न्युनिकरण गर्न खेलकुदको उधेशय रहेको आयोजक समितिले जनाएको छ ।
आयोजक न्यु रामधुनी फुटबल क्लवका अध्यक्ष माझीले प्रतियोगिताको बारेमा जानकारी दिनु हुँदै क्लव दर्तागरी आधिकारीक रुपले प्रतियोगिता गर्न लागेको जानकारी दिनुभयो ।
उहाँले स्थानीय युवाहरुलाई आफनै लगानीमा खेलकुद सम्बन्धी ट्रेनिङ्ग दिदै आउनु भएको छ । इक्राही खेल मैदान विकास र व्यवस्थापनका लागि आवश्यक रहेको भन्दै फिल्डको मापदण्ड पुर्याउनका लागि सम्बन्धित निकाय संग अनुरोध गर्नु भएको छ ।
यसैगरी आयोजक समितिका सचिव तथा प्रतियोगिता संयोजक नवराज खड्काले खेलकुद विकास अभियान रहेको बताउनु भयो । खेलकुद माध्यमबाट आपसी सदभाव, एकता र रामधुनी मन्दिरको पर्यटन विकासका लागि प्रतियोगिता रहेको भन्दै खेलमा पुरस्कृत गरिने राशी लगायत प्रतियोगिताको तयारी बारेमा प्रष्ट पार्नु भएको छ ।

प्रथम न्यू रामधुनी च्यालेन्ज कप फुटबल प्रतियोगिता कार्तिक ३ गते फाइनल खेल सहित समापन गर्ने छन् । प्रतियोगितामा असोज २९ गते राजावास फुटबल क्लव भर्सेज पंचायन फुटबल क्लव विच खेल हुने छ । असोज ३० गते न्यु रामधुनी फुटबल क्लव आयोजक भर्सेज प्रकाशपुर फुटबल क्लव, असोज ३१ गते इन्द्रेनी फुटबल क्लव कालाबन्जर भर्सेज सान नेपाल प्रा.ली. इटहरी बिच खेल हुने आयोजक समितिले जानकारी दिएका छन् ।
प्रतियोगितामा प्रथमहुने टिमलाई रु ५१ हजार र शिल्ड, मेडल, प्रमाण पत्र प्रदान गरिने छ भने दोस्रो हुनेलाई रु ३१ हजार र शिल्ड, मेडल, प्रमाण पत्र प्रदान गरिने आयोजक समितिले जनाएको छ । प्रतियोगिता रामधुनी – ४ इक्राही खेल मैदानमा हुने छ ।