रामधुनी खबर संवाददाता
झुम्का, २६ मंसिर । नेपाली कांग्रेस रामधुनी नगर समितिको सभापति पदमा युवा नेता महेश चौधरीले उम्मेदवार दिने तयारी गरेका छन् । आगामी हुने १५ औँ महाधिवेशन अन्तर्गत नगर अधिवेशनको उमेदवारीका लागि सभापति पदमा चौधरीले तयारी गरेका हुन् ।
नेपाली काग्रेस वडा समितिको सभापतिमा दुई कार्यकाल, तरुणदल नगर कोषाध्यक्ष, २ पटक जनप्रतिनिधि वडा अध्यक्ष र काग्रेस नगर समितिको सचिवको जिम्मेवारी सम्हालि सक्नुभएका चौधरीले यसपटक सभापतिमा उम्मेदवारी दिने तयारी गरेका छन् ।
पार्टी तथा जनप्रतिनिधिको नेतृत्वदायी भूमिकाको सफलता र अब्बलताले यस पटक सभापति पदमा उमेदवारी दिने बताउनु भएको छ । ‘अघिल्लो अधिवेशनमा नगर समितिको सचिव पदमा निर्वाचित भए, जनप्रतिनिधिको रुपमा वडाअध्यक्षको दुई कार्यकाल चुनाव जिते, उहाँले भन्नुभयो– ‘यसपटक सभापतिको उम्मेदवार बन्दैछु । सबैको साथ र सहयोगको अपेक्षा राख्दछु ।’
नेपाली काग्रेसका वर्तमान नगर सभापति सुदिप अधिकारी संगै राजनीतिक करियर सुरु गरेका चौधरी काग्रेस सभापतिको अग्रसरतामा छन् । काग्रेस नगर समिति सचिव, रामधुनी वडा नं. १ का वडाअध्यक्ष समेत रही नेतृत्वको जग सम्हाली सकेकाले नगर सभापतिको बलियो दावेदारको रुपमा उभिएका छन् ।

नेपाली कांग्रेसले पुस २६ देखि २८ गतेसम्म १५ औं महाधिवेशन गर्ने निर्णय गरेको छ । नेपाली कांग्रेसको १५ औं महाधिवेशन अन्तर्गत पुस १७ गते पालिकाहरुको अधिवेशन हुँदैछ । सोही अन्तर्गत नेपाली कांग्रेस नगर समिति, रामधुनी नगरको पनि अधिवेशन हुन लागेको नगर सचिव महेश चौधरीले बताउनु भयो ।
अधिवेशन पुस १६ गते गाउँ÷नगर वडा अधिवेशन हुने छन् । गाउँ÷नगरपालिका अधिवेशन– पुस १७ गते, प्रदेश सभा क्षेत्रीय अधिवेशन– पुस १९ गते, प्रतिनिधि सभा क्षेत्रीय अधिवेशन÷एक मात्र प्रतिनिधि सभा निर्वाच क्षेत्र भएको जिल्ला अधिवेशन– पुस २१ गते, दुई वा दुईभन्दा बढी प्रतिनिधि सभा क्षेत्र भएको जिल्ला अधिवेशन– पुस २२ गते, प्रदेश अधिवेशन– पुस २३ र २४ गते, केन्द्रीय महाधिवेशन– पुस २६, २७ र २८ गते काठमाडौंमा हुने छन् ।