राख सम्वाददाता
झुम्का, साउन ३० । कोरोना भाइरसबाट बच्न बढी प्रभावकारी उपाय मास्क लगाउने रहेकाले सबैले अनिवार्य मास्क लगाउन सचेतना सहित झुम्कामा सुक्रवार मास्क अभियान संचालन गरेको छ । बढी सम्पर्कमा आउने र भिडभाडहुने झुम्का बजारमा ब्यापारी तथा आउजाउ गर्ने सर्वसाधारणहरुलाई कोरोना बिरुद्ध जागरुक गराएको हो ।
सेभ द अर्थको समन्बयमा रामधुनी नगरपालिका, स्वास्थ्य शाखा रामधुनी, झुम्का उद्योगबाणिज्य संघ, संचार गृहको सहभागीतामा मास्कलाई सही तरिकाले लगाउन र सिकाउनका लागि अभियान सञ्चालन गरिएको छ । बजारमा अभियान कार्यक्रम संचालन गरिरहदा धेरैले मास्क बिनै हिड्डुल गरेको देखियो । मास्क लगाएपनि नाक, मुख नछोप्नेगरी चिउँडो, घाँटीमा लगाउने, गोजीमा राखेर साधन चलाउने, सहि तरिकाले मास्क नलगाउने जस्ता असावधानी रुपमा मास्क प्रयोग गरेको देखिएको छ । असावधानीले कोरोना बिरामी बढ्न सक्ने भएकोहुदा नगर प्रमुख जयप्रकाश चौधरीको उपस्थितीमा बजारमा मास्क अभियान र मास्क बितरण गरेको छ । सङ्क्रमण दिनानुदिन बढे पनि मानिसले सही तरिकाले मास्क नलगाउनाले आफु पनि असुरक्षित अरुलाई पनि समस्या निमत्याउने भएकोहुदा मास्क लगाउन आवस्यक रहेको नगरप्रमुख जयप्रकाश चौधरी बताउनु भयो ।
मास्कको जनचेतना नभएर मास्क लगाई मानिसको व्यवहारमा परिवर्तन गर्न अभियान सञ्चालनको सार्थकता बारेमा सेभ द अर्थका अध्यक्ष पुष्प भट्टराईले बताउनु भयो । बजार क्षेत्रमा मात्र हैन गाउँ टोलमा समेत मास्क बितरण र कोरोना बिरुद्ध साप्ताहिक रुपमा सचेतना कार्यक्रम संचालन गरेको भट्टराईले जानकारी दिनुभयो ।
कोरोनाको अवस्था भने रामधुनी नगरमा हाल सम्म कोरोना संक्रमित ७ सय ८३ जनामा देखिएको छ । पिसिआरबाट २१२ र एन्टिजेनबाट २५३ जनमा पुष्टि भएको छ । कोरोनाकै कारण रामधुनीमा २७ जनाको मृत्यु भएको स्वास्थ्य शाखाका नगेन्द्र पौडेलले जानकारी दिनु भएको हो । स्वास्थ्य तथा जनसंख्या मन्त्रालयले शनिबारबाट नेपाल मास्क अभियान सुरु गरेको थियो । ‘महामारी नियन्त्रण र रोकथाममा मेरो प्रतिबद्धता मास्क लगाउनु नै आजको आवश्यकता’ भन्ने मूल नाराका साथ मन्त्रालयले साउन २३ गतेदेखि २९ गतेसम्म अभियान सञ्चालन गरेको थियो । सरकारको अभियान संचालनमा प्रतिबद्धता सहित एक्यबद्धता जनाउदै रामधुनीका क्रृयाशिल सामाजिक संस्था र सामाजिक अगुवाहरुले मास्क अभियान गरेको हो ।