रामधुनी खबर संवाददाता
झुम्का,भदौ २९ । नेपाली कांग्रेस रामधुनी नगर सभापतिका लागि महेश चौधरीको दाबेदारी बलियो देखिएको छ । पार्टी संगठनमा लामो समयदेखि निरन्तर सक्रिय रहँदै विभिन्न जिम्मेवारी सफलतापूर्वक निर्वाह गरेको अनुभवका कारण चौधरीलाई नगर सभापतिको सम्भावित उम्मेदवारका रूपमा दाबेदारी बलियो देखिएको हो ।
चौधरीले नेपाली कांग्रेसको भ्रातृ संगठन तरुण दलको नगर कोषाध्यक्षका रूपमा जिम्मेवारी सम्हाल्दै संगठनात्मक गतिविधिमा सक्रिय भूमिका निर्वाह गरेका छन् । त्यसपछि नेपाली कांग्रेसको १३औँ अधिवेशनबाट वडा सभापतिको जिम्मेवारी प्राप्त गरी पार्टी संगठनलाई स्थानीय तहमा थप सक्रिय बनाउन भूमिका खेलेका छन् ।
त्यसैगरी, चौधरीले वडाध्यक्षका रूपमा दुई कार्यकाल जनप्रतिनिधिको जिम्मेवारीसमेत सफलतापूर्वक निर्वाह गरिसकेका छन् । जनप्रतिनिधिका रूपमा स्थानीय जनतासँग प्रत्यक्ष रूपमा जोडिएर काम गरेको अनुभवलाई उनको राजनीतिक यात्राको महत्वपूर्ण पक्षका रूपमा लिइएको छ ।
हाल उनी नेपाली कांग्रेस रामधुनी नगर कार्यसमितिका नगर सचिवका रूपमा सक्रिय छन् । नगर सचिवको जिम्मेवारी सम्हाल्दै पार्टीका सांगठनिक गतिविधि, कार्यकर्ता परिचालन तथा समन्वयमा चौधरीले सक्रियता देखाउँदै आएका छन् ।
पार्टीको भ्रातृ संगठनदेखि वडा तहको नेतृत्व, दुई कार्यकाल जनप्रतिनिधिको अनुभव हुँदै नगर सचिवसम्मको यात्राले चौधरीलाई संगठन र स्थानीय जनताको तहमा काम गर्ने पर्याप्त अनुभव दिएको उनका समर्थकहरूको दाबी छ।
आगामी नगर अधिवेशनलाई लक्षित गर्दै नेपाली कांग्रेस रामधुनीभित्र नेतृत्वका आकांक्षीहरूबीच छलफल र सक्रियता बढिरहेका बेला चौधरीको दाबेदारीलाई पनि अर्थपूर्ण रूपमा हेरिएको छ। संगठनप्रतिको निरन्तर सक्रियता, नेतृत्वको अनुभव र जनप्रतिनिधिका रूपमा प्राप्त कार्यानुभव उनका मुख्य आधारका रूपमा देखिएका छन् ।
रामधुनी नगरमा कांग्रेस संगठनलाई थप व्यवस्थित र गतिशील बनाउने, पुराना कार्यकर्ताको अनुभवलाई सम्मान गर्दै नयाँ पुस्तालाई पार्टीमा आकर्षित गर्ने तथा स्थानीय जनतासँग पार्टीको सम्बन्ध अझ मजबुत बनाउने विषयमा चौधरी प्रतिबद्ध र सक्रृय रहदै आएका छन् ।
