रामधुनी खबर संवाददाता
झुम्का, असोज ८ । रामधुनी नगरपालिकाले सम्भावित भारी वर्षा तथा हावाहुरीबाट हुन सक्ने जोखिम न्यूनीकरणका लागि सम्पूर्ण नगरवासीलाई उच्च सतर्कता अपनाउन आग्रह गर्दै सचेतनामूलक सूचना जारी गरेको छ ।
रामधुनी नगरपालिकाको नगरस्तरीय विपद् व्यवस्थापन समितिको मिति २०८३/०६/०७ गते बसेको बैठकको निर्णय तथा जल तथा मौसम विज्ञान विभागको पूर्वसूचनाअनुसार २०८३ असोज ९ गतेदेखि असोज ११ गतेसम्म कुनै पनि बेला मौसममा परिवर्तन भई भारी वर्षा तथा हावाहुरी आउन सक्ने सम्भावना रहेको जनाइएको छ ।
सम्भावित विपद्बाट धनजनको क्षति न्यूनीकरण गर्न नगरपालिकाले नगरवासीलाई उच्च सतर्कता अपनाई सुरक्षित स्थानमा रहन अनुरोध गरेको छ। हाल देशका अधिकांश स्थानमा मनसुनी तथा पश्चिमी वायुको संयुक्त प्रभावका कारण हल्कादेखि भारी वर्षा भइरहेको र यसबाट हावाहुरी, बाढी तथा डुबानको जोखिम बढ्न सक्ने जनाइएको छ।
नगरपालिकाले सुरक्षा तथा सावधानीका लागि घरका छाना, झ्यालढोका, टिन, होर्डिङ बोर्ड तथा हावाले उडाउन सक्ने अन्य सामग्री सुरक्षित राख्न आग्रह गरेको छ। त्यस्तै, विद्युतका पोल तथा तार, रुख र कमजोर संरचनाको नजिक नबस्न तथा अत्यावश्यक कामबाहेक भारी वर्षा र हावाहुरीको समयमा घरबाहिर ननिस्कन अनुरोध गरिएको छ।त्यसैगरी, बालबालिका, ज्येष्ठ नागरिक तथा अशक्त व्यक्तिहरूको विशेष ख्याल गर्न, खोलानाला तथा नदीमा नजान र डुबान हुन सक्ने तथा अन्य जोखिमयुक्त क्षेत्रमा आवतजावत नगर्न नगरपालिकाले आग्रह गरेको छ ।
आपत्कालीन अवस्था सिर्जना भएमा नजिकको वडा कार्यालय, प्रहरी कार्यालय वा रामधुनी नगरपालिकामा तत्काल सम्पर्क गर्नसमेत नगरपालिकाले अनुरोध गरेको छ ।
