रामधुनी खबर संवाददाता
झुम्का, असोज १३ । सामाजिक सेवामा सक्रिय अन्तर्राष्ट्रिय संस्था लायन्स क्लब अन्तर्गत लायन्स क्लब डिस्ट्रीक्ट ३२५ सी का तीन क्लबका नव निर्वाचित अध्यक्ष तथा पदाधिकारीहरूको संयुक्त पदस्थापन गरिएको छ । लायन्स क्लब अफ रामधुनी, लायन्स क्लब अफ झुम्का र लायन्स क्लब अफ बराहक्षेत्र कलाबन्जरका नव निर्वाचित अध्यक्ष तथा पदाधिकारीहरूको संयुक्त पदस्थापन कार्यक्रम सोमबार सम्पन्न भएको हो ।
डिस्ट्रीक्ट गभर्नर लीलाप्रसाद चिमरियाको प्रमुख आतिथ्यतामा सम्पन्न कार्यक्रममा सन् २०२६÷०२७ का लागि लायन्स क्लब अफ रामधुनीका अध्यक्ष मिलन रौनियार, लायन्स क्लब अफ झुम्काका अध्यक्ष सुशिल साह र लायन्स क्लब अफ बराहक्षेत्र कलाबन्जरका अध्यक्ष विनोद चौधरी सहित नव निर्वाचित पदाधिकारीहरूको पदस्थापन गरिएको छ ।
कार्यक्रममा डिस्ट्रीक्ट गभर्नर चिमरियाले नव निर्वाचित अध्यक्षहरूलाई ग्याबल हस्तान्तरण गर्दै अन्तर्राष्ट्रिय लायन पिन लगाइ दिनुभएको थियो । उहाँले क्लबका पदाधिकारीहरूको काम, कर्तव्य र अधिकारका बारेमा जानकारी गराउँदै सामाजिक सेवाका कार्यलाई प्राथमिकतामा राखेर जिम्मेवारी निर्वाह गर्न सुझाव दिनुभयो ।
पदस्थापन कार्यक्रममा निवर्तमान अध्यक्षहरूले नवनिर्वाचित अध्यक्षहरूलाई सम्मानपूर्वक अध्यक्षको आसन सम्म सहयात्रा गराउने विशेष कार्यक्रम समेत गरिएको थियो । लायन्स क्लब अफ रामधुनीका निवर्तमान अध्यक्ष कमल कुमार साहले मिलन रौनियारलाई, लायन्स क्लब अफ झुम्काका निवर्तमान अध्यक्ष नवराज खड्काले सुशिल साहलाई र लायन्स क्लब अफ बराहक्षेत्र कलाबन्जरका निवर्तमान अध्यक्ष अविषेक कार्कीले विनोद चौधरीलाई फूलमाला लगाई हात समाउँदै अध्यक्षको स्थानसम्म सहयात्रा गराउनुभएको थियो ।
नवनिर्वाचित अध्यक्ष मिलन रौनियारले आफ्नो प्रतिबद्धता व्यक्त गर्दै सबैको साथ र सहयोगमा क्लबलाई थप सक्रिय र प्रभावकारी रूपमा अघि बढाउने बताउनु भयो ।
त्यसैगरी, लायन्स क्लब अफ झुम्काका अध्यक्ष सुशिल साहले आगामी कार्ययोजनाका बारेमा प्रतिबद्धता व्यक्त गर्दै क्लबका गतिविधिलाई थप व्यवस्थित र प्रभावकारी बनाउने बताउनुभयो ।
लायन्स क्लब अफ बराहक्षेत्र कलाबन्जरका अध्यक्ष विनोद चौधरीले सामाजिक सेवाका क्षेत्रमा क्लबलाई सक्रिय बनाउँदै समुदायमुखी कार्यलाई प्राथमिकता दिने प्रतिबद्धता व्यक्त गर्नुभयो ।
कार्यक्रममा लायन धिरज गुरुङ, धनकुमारी गुरुङ, मिना ढुंगेल र दुर्गाप्रसाद फुयालले नवनिर्वाचित पदाधिकारीहरूलाई थप जिम्मेवार भएर रचनात्मक ढंगले क्लबका गतिविधि अघि बढाउन सुझाव दिँदै सफल कार्यकालको शुभकामना व्यक्त गर्नु भएको थियो ।
पदस्थापन कार्यक्रम लायन्स क्लब अफ रामधुनी, लायन्स क्लब अफ झुम्का र लायन्स क्लब अफ बराहक्षेत्र कलाबन्जरको संयुक्त आयोजनामा भएको आयोजक समितिले जनाएका छन् ।
लायन्स क्लब भनेको विश्वभर सामाजिक सेवा र मानवीय सहयोगका क्षेत्रमा काम गर्ने अन्तर्राष्ट्रिय स्वयंसेवी संस्था हो । यसको मुख्य उद्देश्य स्वयंसेवा मार्फत समुदाय र मानव जीवनमा सहयोग पु¥याउनु हो ।
क्लवले मुख्य कार्यहरुमा समुदाय विकास र सामाजिक सेवा गर्दै आएका छन् । विद्यार्थी तथा शिक्षामा सहयोग, विपद् तथा आपत्कालीन अवस्थामा राहत, विपन्न तथा असहाय व्यक्तिलाई सहयोग, आँखा स्वास्थ्य तथा दृष्टि संरक्षण कार्यक्रम, स्वास्थ्य शिविर तथा स्वास्थ्यसम्बन्धी सहयोग, रक्तदान कार्यक्रम, वातावरण संरक्षण तथा वृक्षरोपणका कार्यक्रमहरु गर्दै आएका छन् ।
