रामधुनी खबर संवाददाता
इटहरी,असोज १५ । कोशी प्रदेशका युवा जनशक्तिलाई सीप तथा रोजगारीसँग जोड्ने उद्देश्यले इटहरीमा रोजगार मेला सुरु भएको छ । ‘सीप र रोजगारी साझा जिम्मेवारी’ भन्ने मूल नाराका साथ नेपाल सरकार, युवा, श्रम तथा रोजगार मन्त्रालयको आयोजनामा असोज १४ गते बुधबार देखि मेला सुरु भएको हो ।
संघीय युवा, श्रम तथा रोजगार मन्त्री रामजी यादवको अध्यक्षतामा आयोजित कार्यक्रममा रोजगार मेलाको शुभारम्भ गरिएको थियो । मेलामा ६५ भन्दा बढी रोजगारदाता उद्योगी–व्यवसायीहरूको स्टल सहभागिता रहेको छ । विभिन्न उद्योग, प्रतिष्ठान तथा व्यवसायका स्टल राखिनुका साथै रोजगारी खोजिरहेका युवाहरूलाई रोजगारदाता सँग प्रत्यक्ष सम्पर्क गर्ने अवसर प्रदान गरिएको छ ।
मेलाको पहिलो दिन ‘क्यारियर उडान’ शीर्षकमा सार्थक संवाद कार्यक्रमसमेत आयोजना गरिएको थियो । कार्यक्रममा रोजगारदाताले रोजगारीका लागि उम्मेदवार छनोट गर्दा ध्यान दिने विषय, आवश्यक सीप तथा रोजगार बजारका अपेक्षाल गायतका विषयमा सहभागीलाई जानकारी गराइएको छ ।
व्यावसायिक रोजगारदाता क्याबिनेट श्रेष्ठ र रितु सिंह वैद्यले शैक्षिक योग्यतासँगै सीपको आवश्यकता र महत्वबारे आफ्ना धारणा राखेका छन् । सहजकर्ता संजोग कोइरालाले सहजीकरण गरेको कार्यक्रममा रोजगारका लागि आवश्यक सीप, रोजगारदाताको अपेक्षा तथा छनोट प्रक्रियाका विषयमा सहभागीलाई जानकारी दिइएको हो ।
कार्यक्रमबाट सहभागी युवाहरूले रोजगारीका लागि आवश्यक योग्यता तथा सीपका बारेमा जानकारी प्राप्त गरेका छन् । विभिन्न रोजगारदाता उद्योगी–व्यवसायीका स्टलमा पुगेर आवेदन फाराम भरी रोजगारीका लागि आवेदन समेत दिएका छन् ।
यसैगरी, आफूले सिक्न चाहेको सीपसहित नाम, ठेगाना र मोबाइल नम्बर दर्ता गराउने व्यवस्था गरिएको छ । युवा, श्रम तथा रोजगार मन्त्रालयको वेबसाइट तथा क्यूआर कोडमार्फत समेत नाम दर्ता गर्ने प्रक्रिया सुरु गरिएको आयोजकले जनाएको छ । दर्ता भएका युवाहरूलाई उनीहरूको रुचि र आवश्यकता अनुसारको सीप विकास कार्यक्रममा सहभागी गराई रोजगारीसँग जोड्ने उद्देश्य रहेको जनाइएको छ ।
रामधुनी–९ का वडाध्यक्ष चौधरीद्वारा रोजगार मेलाको अवलोकन
कोशी प्रदेशका विभिन्न जिल्ला तथा स्थानीय तहबाट आएका युवाहरू रोजगार मेलामा सहभागी भइरहेका बेला रामधुनी नगरपालिका–९ नं. का वडाध्यक्ष घनश्याम चौधरीले मेलाको अवलोकन गर्नु भएको छ । वडाध्यक्ष चौधरीले रोजगार मेला बेरोजगार युवाहरूका लागि महत्वपूर्ण अवसर भएको बताउँदै रामधुनी नगरवासीलाई मेलामा सहभागी भई उपलब्ध अवसरबाट लाभ लिन अनुरोध गर्नु भएको छ ।
उहाँले युवाहरूले लोकसेवा तथा अन्य रोजगारीका अवसरसँगै आफ्नै सिर्जनात्मक सीप र क्षमताको प्रयोग गरी आत्मनिर्भर बन्नुपर्नेमा जोड दिनुभयो । सीप विकास र आत्मनिर्भरतालाई आगामी दिनको विकास तथा रोजगारीको महत्वपूर्ण आधारका रूपमा लिनुपर्ने उहाँको भनाइ रहेको छ ।
रामधुनी रोजगार सेवा केन्द्रमा ४ सयभन्दा बढी रोजगार माग
रामधुनी रोजगार सेवा केन्द्रका प्रमुख खगेन्द्र सुब्बाले रोजगार मेला, यसबाट प्राप्त गर्न सकिने अवसर तथा सहभागी हुने प्रक्रियाबारे जानकारी दिनु भएको छ । उहाँका अनुसार रामधुनी रोजगार सेवा केन्द्रमा हालसम्म ४ सयभन्दा बढी रोजगारदाताबाट श्रमिकको माग आएको जानकारी दिनु हुँदै रोजगारीको खोजीमा रहेका नगरवासीलाई रामधुनी रोजगार सेवा केन्द्रमा सम्पर्क गर्न अनुरोध गर्नु भएको छ ।
कोशी प्रदेशका युवाहरूलाई स्थानीय तथा स्वदेशी श्रम बजारसँग जोड्दै सीपअनुसारको रोजगारी उपलब्ध गराउने, उद्यमशीलताका लागि प्रोत्साहन गर्ने तथा रोजगारदाता र रोजगारी खोज्ने युवाबीच प्रत्यक्ष सम्बन्ध स्थापित गर्ने उद्देश्यले मेला आयोजना गरिएको हो । रोजगारीको खोजीमा रहेका तथा नयाँ सीप सिक्न चाहने युवाहरूलाई रोजगार मेलामा सहभागी भई उपलब्ध अवसरको उपयोग गर्न आयोजकले आग्रह गरेको छ ।
रोजगार मेलाले रोजगारदाता र रोजगारी खोजिरहेका युवाबीच प्रत्यक्ष सम्पर्क स्थापित गराउने तथा युवालाई आवश्यक सीप र रोजगारीका अवसरसँग जोड्ने अवसर प्रदान गरेको छ । रोजगार सेवा संगै रोजगार मेला असोज २० गते सम्म रहने आयोजकले जनाएको छ ।
