रामधुनी खबर संवाददाता
झुम्का, असोज २८ । उपभोक्ताको हित संरक्षण, बजारमा वस्तु तथा सेवाको गुणस्तर कायम तथा कृत्रिम मूल्यवृद्धि नियन्त्रण गर्ने उद्देश्यले सुनसरीको रामधुनी नगरपालिका अन्तर्गत झुम्का बजारमा बजार अनुगमन गरिएको छ । अनुगमनका क्रममा शिशुले खाने दुग्ध पाउडरदेखि म्याद गुज्रिएका खाद्यवस्तु, लेबल नभएका सामग्री तथा अन्य उपभोग्य वस्तुको बिक्री वितरणमा भेटिएको छ ।
रामधुनी नगरपालिका र खाद्य प्रविधि तथा गुण नियन्त्रण डिभिजन कार्यालय सुनसरीको समन्वयमा नगर उपप्रमुख तारा थापाको संयोजकत्वमा मंगलबार र बुधबार झुम्काको लगुना चोक, मुख्य बजार क्षेत्रका किराना पसल, मासु पसल तथा होटलमा अनुगमन गरिएको हो। अनुगमनका क्रममा दैनिक उपभोग्य वस्तुको मूल्य, गुणस्तर, म्याद, नापतौल र व्यवसाय सञ्चालनसम्बन्धी मापदण्डको अवस्थाबारे निरीक्षण गरिएको थियो ।
शिशुले खाने दुग्ध पाउडरमा समेत मापदण्डको लेबल नभएको पाइयो
अनुगमनका क्रममा किराना पसलमा बिक्रीका लागि राखिएका शिशुले खाने दुग्ध पाउडरमा खाद्य गुणस्तरसम्बन्धी आवश्यक लेबल तथा चिन्ह नभएको पाइएको छ । त्यसैगरी, म्याद गुज्रिएका खाद्यवस्तु, मूल्यसूची नराखिएका पसल तथा भारतीय पेयपदार्थको अवैध बिक्री वितरणसमेत भेटिएको जनाइएको छ ।
उपभोक्ताको स्वास्थ्यमा प्रत्यक्ष असर पार्न सक्ने यस्ता वस्तुको बिक्री वितरण नगर्न व्यवसायीलाई सचेत गराइएको छ । मापदण्डविपरीत तथा अखाद्य अवस्थामा रहेका वस्तु नष्टसमेत गरिएको छ ।
मासु पसलमा सरसफाइको कमी, मासुमा रङ प्रयोग
मंगलबार गरिएको मासु पसलको अनुगमनका क्रममा सरसफाइमा कमी रहेको, मासुमा खाद्य प्रयोजनका लागि उपयुक्त नभएको रङ प्रयोग गरिएको तथा बिक्रीयोग्य र बिक्रीका लागि अनुपयुक्त मासु एउटै फ्रिजमा राखिएको पाइएको थियो । मासुको स्वच्छता र गुणस्तर कायम राख्नुपर्नेमा लापरबाही गरेको पाइएपछि सम्बन्धित व्यवसायीलाई सचेत गराइएको अनुगमन टोलीले जनाएको छ ।
त्यसैगरी, होटलमा म्याद गुज्रिएका सामग्री प्रयोग गरिएको तथा लेबल नभएका वस्तु भेटिएको खाद्य प्रविधि तथा गुण नियन्त्रण डिभिजन कार्यालय सुनसरीले जनाएको छ ।
उपभोक्ता आफैँ पनि सचेत हुनुपर्छ ः उपप्रमुख थापा
रामधुनी नगरपालिकाकी उपप्रमुख तारा थापाले चाडपर्वका समयमा अखाद्य तथा गुणस्तरहीन वस्तुको बिक्री वितरण बढ्न सक्ने भएकाले बजार अनुगमनलाई प्राथमिकता दिइएको बताउनुभयो । अनुगमनको उद्देश्य व्यवसायीलाई दुःख दिनु नभई उपभोक्ता र नागरिकको स्वास्थ्य तथा हित संरक्षण गर्नु रहेको उहाँको भनाइ छ । उपभोक्ताले पनि दैनिक उपभोग्य वस्तु खरिद गर्दा त्यसको म्याद, गुणस्तर, लेबल र मूल्यमा ध्यान दिनुपर्ने उहाँले बताउनुभयो ।
अनुगमनलाई निरन्तरता दिइने
खाद्य प्रविधि तथा गुण नियन्त्रण डिभिजन कार्यालय सुनसरीका उज्ज्वल कोइरालाले अनुगमनका क्रममा होटलमा म्याद गुज्रिएका सामग्री तथा लेबल नभएका वस्तु फेला परेको र त्यस्ता सामग्री नष्ट गरिएको जानकारी दिनुभयो । उपभोक्ताको स्वास्थ्यसँग प्रत्यक्ष जोडिएको खाद्यवस्तुको गुणस्तर कायम गर्न बजार अनुगमनलाई निरन्तरता दिइने उहाँले बताउनु भएको छ ।
बजार अनुगमनले उपभोक्ताको हित संरक्षण गर्नुका साथै व्यवसायीलाई प्रचलित मापदण्डअनुसार व्यवसाय सञ्चालन गर्न जिम्मेवार बनाउने अपेक्षा गरिएको छ । यसबाट बजारप्रति उपभोक्ताको विश्वास बढाउन र सुरक्षित तथा गुणस्तरीय वस्तुको बिक्री वितरण सुनिश्चित गर्न सहयोग पुग्ने विश्वास गरिएको छ ।
