राख संवाददाता
झुम्का, माघ ४ । थारु साँस्कृतिक पहिचान झल्काउँदै रामधुनी नगरपालिका झुम्काको जितमहान चोकमा माघ १ गते आइतवार भब्य तिलासंक्राइत माघी कार्यक्रम सम्पन्न गरेको छ । मौलिक पर्व तिलासंक्राइत माघीको अवसरमा स्थानीय जनप्रतिनिधि, सामाजिक अभियान्ताहरुको सुझात्मक सल्लाह लगायत थारु कलाकारहरुको साँस्कृतिक प्रस्तुती सहित तिलासंक्राइत माघी सांस्कृतिक कार्यक्रम २०७९ सम्पन्न गरेको हो ।
तिलासंक्राइत माघी पर्वमा मिठा–मिठा परिकार, नयाँ अन्नबालीबाट बनाएका परिकार, जाडो समय रहेकाले शरीरमा तापक्रम सन्तुलन राख्ने परिकारहरु खाएर उत्सवको रुपमा मनाउँदै आएको छ । यस दिन देखि सूर्य उत्तरायण लाग्ने भएकाले पनि खगोलिय दृष्टिले शुभमान्ने अवसरकोदिन रहेकोले थारु समुदाय ऐतिहासिक कालखण्ड देखिनै यस दिन पर्व मौलिक रुपमा मनाउँदै आएको छ । नयाँ कृषि उत्पादन भएको तिल धार्मिक दृष्टिकोण र मानव जिवनमा बिशेष महत्व रहेकोले सख्खर मिश्रित तिलको लड्ड र भूजाको लाय पर्वको प्रमुख परिकार मान्दै पर्वलाई तिलासंक्राइत, माघी, खिचरीको नामले मनाउँदै आएको छ । तिले–तिले दिन लामा र गर्मि हुँदै जाने भएकोले पनि यस पर्वलाई बिशेष तिलासंक्राइत पर्वको नामले मनाउँदै आएको पाइन्छ ।
थारु महिला उत्थान समाज रामधुनी र मेगा डिजिटल रेकर्डिङ्ग स्टुडियो झुम्काद्धारा आयोजित सो कार्यक्रममा अतिथी तथा सामाजिक अभियान्ताहरुले नयाँपुस्ताका लागि सामाजिक विकासका बिचार तथा धारणा, सुझावहरु ब्यक्त गरेका छन् भने थारु कलाकार, गायकहरुले आफनो कला प्रस्तुत गर्दै थारु साँस्कृतिक पहिचान झल्काएका छन् । कलाकारहरु थारु भेषभुषामा थारु भाषाका पर्व तथा अधिकारका गीतसंगीतमा नृत्यगरी थारु साँस्कृतिक पहिचान झल्काएका हुन् ।
कार्यक्रमका प्रमुखअतिथी नगरप्रमुख शंकरलाल चौधरीले महिलाहरुको अगुवाईमा आयोजित कार्यक्रम भब्यरुपले आयोजना गरेको बताउँनुभयो । कार्यक्रममा बोल्दै नयाँपुस्ताको बृहत उपस्थितीमा पर्वको उत्थान गर्ने बैचारिक धारणा, साँस्कृतिक नृत्य प्रदर्श प्रस्तुतीले भब्यता र सान्दर्भिक कार्यक्रम को आयोजना भएको भन्दै शुभकामना ब्यक्त गर्नुभयो । थारु समुदायका नयाँपुस्ता बिद्यार्थी जिवनबाटै राजनीतिक क्षेत्र बनाउँदै आउँनु पर्ने उल्लेख गर्नुभयो । इटहरी जनता क्याम्पसमा बिद्यार्थी संगठन स्वब्यु को सभापतिमा थारु महिला बिजय भएको भन्दै यसकालागि थारु बिद्यार्थीको अहमभूमिका रहेको स्मरण गराउँनुभयो । यसरी नेतृत्वपंत्तिमा आउँन आगामि दिनमा पनि संगठित हुनुपर्ने नगरप्रमुख चौधरीले धारणा राख्दै सुझाव ब्यक्त गर्नुभयो ।
थारु समुदाय आफनो संस्कार जर्गेनागर्न जागरुक रहेको नगरउपप्रमुख तारा थापा ले बताउँनुभयो । थारु समुदायमा हरेक मौलिक पर्वको अवसरमा रामधुनी नगर अन्तर्गत संस्कार संस्कृति उठान गर्ने खालका कार्यक्रमहरु गर्दै आएकोले जागरुकता संगै अपनत्व रहेको भन्दै आगामि दिनमा पनि निरन्तरता दिनु पर्ने उठान गर्नुभयो । पर्वहरुले नेपालीमा एकताको शन्देस दिने महत्व बोकेकोले थारु समुदाय कार्यक्रमको आयोजनागरी सो महत्व दर्शाउँदै आएको धारणा राख्नुभयो ।
यसैगरी थारु कानून व्यवसायी सभा केन्द्र अध्यक्ष रामराज चौधरीले रामधुनी नगरपालिकाका जनप्रतिनिधिहरु थारु राष्ट्रियता स्विकार गर्न नसकेकोमा गुनासो ब्यक्त गर्नुभयो । कार्यक्रममा बोल्दै चौधरीले रामधुनीमा थारु पहिलो बसोवास र बाहुल्य रहेकोले यहाँ पहिलो नागरिक घोषणा, थारु भाषामा पठन पाठन, ग्रामथान संरक्षण नीति, थारु समुदायमा आर्थिक सबलताका लागि प्राथमिक्तामा राख्न कन्जुस्याइ गरेको भन्दै अधिवक्ता चौधरीले गुनासो गरेका हुन् ।
थारु महिला उत्थान समाज रामधुनीकी अध्यक्ष सिता चौधरीले कार्यक्रम समापन गर्दै थारु संस्कार, संस्कृतिको संरक्षण सहितको रामधुनी नगर पहिचान, पर्यटन प्रवद्र्धन, महिला नेतृत्वको विकासका लागि आयोजना गरेको कार्यक्रमको उधेश्य बारेमा बताउँनुभयो ।
उत्थान समाजकी अध्यक्ष चौधरीको सभापतित्व र स्टुडियोका प्रबन्धक विशाल चौधरीको संयोजकत्वमा आयोजित कार्यक्रममा रामधुनी १ नं. वडा अध्यक्ष महेश चौधरी, वरिष्ठ पत्रकार धनकुटाका सन्जय सन्तोषी राई, थाकस पूर्व जिल्ला अध्यक्ष मिलिराम चौधरी, थारु महिला सभा जिल्ला अध्यक्ष सुशिला लेखी, कलाकार पर्शुराम चौधरी, रेनु चौधरी को उपस्थिती रहेको थियो । कार्यक्रममा कलाकार तथा गायक कुलदिप चौधरी, सुनिल चौधरी, लालबहादुर चौधरी, बिक्रम चौधरी, जगत चौधरी लगायतका कलाकारहरुले प्रस्तुती गरेका थिए । कार्यक्रममा स्वागत मन्तब्य उत्थान समाजकी उपाध्यक्ष आशा चौधरीले स्वागत गर्नुभयो भने कार्यक्रम संचालन संस्थाकी सचिव सनम चौधरी र साँस्कृतिक कार्यक्रम अन्जली चौधरीले संचालन गर्नुभयो।
