राख संवाददाता
झुुम्का,जेष्ठ ३ । थारु समुदायको हकहितमा कार्य गर्ने संगठन थारु कल्याणकारिणी सभा (था.क.स.) रामधुनी नगर कार्य समितिको प्रथम नगर अधिवेशन हुने भएको छ । जानकी चौधरीको संयोजक्त्वमा गठन भएको तदर्थ समितिले यहि जेष्ठ ५ गते अधिवेशनका लागि तयारी पुरा भएको मंगलवार पत्रकार सम्मेलन मार्फत जानकारी दिएको हो ।
साविक भासि, डुम्राहा, बक्लौरी र सिंगिया गाविस समन्वयगरी रामधुनी नगरपालिका भए अनुसार साविक गाविस स्तरीय समिति विगठन गरी थारु कल्याणकारिणी सभा नगर नयाँ कार्य समिति पुर्णताका लागि अधिवेशन गर्न लागेको तदर्थ समितिकी संयोजक जानकी चौधरीले जानकारी दिइन् ।
अधिवेशनमा ९ वटै वडा इकाई समितिबाट ४५ प्रतिनिधि, १८ पर्यवेक्षक सहभागी हुनेछन् । वडा इकाई समितिबाट आएको ४५ प्रतिनिधि र तदर्थ समितिको १२ सदस्यको मतदान अधिकार रहने जनाएको छ । अधिवेशनको खुल्ला सत्र पछि सोहि दिन नयाँ समिति गठनका लागि प्रकृया गर्ने समेत आयोजकले जानकारी दिएको छ । कार्यसमितिको कार्यअवधि ४ बर्षको हुने संशोधित विधानमा उल्लेख रहेको छ ।
राज्यको विभेदपूर्ण नीतिका कारण विभेदमा परेको थारु समुदाय अधिकारका लागि निरन्तर आन्दोलन गरिरहेकोले सो को लागि अडिग रह्न र नेतृत्व गर्न सक्ने सभापति सर्वसहमतिले चयनको प्रयास गर्ने संयोजक चौधरीले बताइन् ।
नगर अधिवेशनका लागि प्रत्येक वडामा वडा इकाई समिति गठन गरेको छ । सवैको सहकार्यमा सर्वसहमतिले थाकस वडा इकाई कार्य समिति गठन गरेको संयोजक चौधरीले जानकारी दिइन् ।
अधिवेशन जेष्ठ ५ गते रामधुनी वडा नं. ५ स्थित कलश ब्याक्युुट पार्टी प्यालेसमा हुने जनाएको छ । अधिवेशन भब्यता प्रदान गर्न प्रत्येक वडाबाट थारु पहिचानको झाँकी सहितको सहभागी रहने आयोजकले जाकारी दिएको छ ।
संगठनले सामाजिक सुधार, आर्थिक सुधार, शैक्षिक सुधार, सांस्कृतिक विकासमा प्रमुुख उधेश्य रहेको छ । नेपालको बहुुसंख्यक मूलवासीको रुपमा मेची देखि महाकाली सम्म फैलिएको थारु समाजमा रहेको कुुप्रथा, अज्ञान्ता, रुढि र सामाजिक विसंगतिहरु हटाउँन सामाजिक, आर्थिक, बौद्धिक चेतना जगाई राष्ट्रिय निर्माणमा समुचित भूमिका खेल्न सकोस भन्ने अभिप्रायले २००५ सालमा गठन भएको हो ।
पत्रकार सम्मेलनमा पूूर्व केन्द्रिय अध्यक्ष चन्द्रकुमार चौधरी, पूर्व केन्द्रिय पार्षद केशीलाल चौधरी, जिल्ला कोषाध्यक्ष तारा चौधरीले थारु समुदायको पहिचान र अधिकारको सवालमा बोल्दै विधान अनुसार लोकतान्त्रिक विधिले नगर समिति गठन गर्ने भन्दै आफनो धारणा ब्यक्त गरेका हुन् ।
पत्रकार सम्मेलनमा स्वागत मन्तव्य पुर्णलाल चौधरीले गरेका थिए भने कार्यक्रम संचालन सह संयोजक सनम चौधरीले गरेकी थिइन् ।
