राख संवाददाता
झुम्का, जेष्ठ २५ । आदिवासी थारु समुदायको मौलिक र परमपरागत रुपमा रहेको बाद्यबाद्यन झाइल, मृदंग तथा पौराणिक गीत गायनका लागि बिहिवार तालिम उद्धघाटन गरेकोे छ । सौनधामी ग्रामथान व्यवस्थापन समिति रामधुनी वडा नं. ३ को आयोजना तथा द राइजिङ्ग म्युजिकल एण्ड डान्स क्लवको समन्वयमा १५ दिने पुुस्तान्तरण तालिम उद्धघाटन गरेको हो ।
तालिम उद्धघाटन गर्दै रामधुनी नगरप्रमुख शंकरलाल चौधरीले मृदंग बजाएर प्रशिक्षार्थीमा हौसला प्रदान गर्नुभयो । मौलिक र परमपरागत साँस्कृतिक पक्षलाई उजागर गर्नका लागि नगरबाट नीति नियम र बजेट बिनियोजन गर्ने मेयर चौधरीले प्रतिबद्धता गर्नु भयो ।
इटहरी उपमहानगरपालिकाका उपमेयर संगिता चौधरीको समेत उपस्थिती रहेको थियो । उहाँले पौरणिक साँस्कृति कला अहिलेको पुस्ताले ग्रहण नगरे थारु समुदायको पहिचान हराएर जाने बताउँनुभयो । यसका लागि स्थानीय तहबाट सहयोग गर्ने र समुदाय समेत जुट्नुपर्ने इटहरी उपमहानगरका उपमेयर चौधरीले सुझाव ब्यक्त गर्नु भयो ।
रामधुनी नगर उपप्रमुख तारा थापाले थारु समुदायकै बस्तिमा हुुर्केको, पढे खेलेकोले संस्कार संस्कृतिबारे नजिकबाट परिचित रहेको भन्दै संरक्षण प्रवद्र्धनका लागि नगरपालिकाबाट साथ सहयोग रहने बताउँनु भयो । थारु समुदाय संस्कार प्रति जागरुक हुँदै गएको भन्दै यहाका कला संस्कृति नगरको सम्पतिको रुपमा समेत रहेकोले संरक्षणको दायित्व नगरपालिकाको रहेको उपमेयर थापाले धारणा ब्यक्त गर्नुभयो ।
थारु समुदायमा धार्मिक कार्य तथा शुभ कार्यमा मौलिक र परम्परागत बाद्यबाद्यन बजाउँने ऐतिहासिकता रहेको छ । बाद्यबाद्यन र पौराणिक गीत भने पश्चिमी संस्कारको प्रभावले अहिले लोप हुने अवस्था रहेको छ । समुदायको पहिचान समेत रहेको पौराणिक कला लोप हुने अवस्थाले चिन्तित भएर जागरुक थारु युवाहरु तालिम संचालन गरेको हो ।
तालिममा मौलिक र परमपरागत रुपमा रहेको बाद्यबाद्यन झाइल र मृदंग बजाउँन, झुमैर, चाचैर, बिरहैन, पराती गाउँन अभ्यास गराइने कार्यक्रम संयोजक सुनिल चौधरीले जानकारी दिए ।
तालिम उद्धघाटन कार्यक्रममा तालिमको उधेश्य बारेमा प्रस्ट्याउँदै थारु समुदायको जन्म देखि मृत्युसम्मको संस्कारमा प्रयोग हुने मौलिक र परमपरागत बाद्यबाद्यन लगायत पौराणिक गीत गाउँन छोडी सकेकोले नयाँ पुस्ताले भार थाम्नका लागि तालिम राखेको थारु महिला उत्थान समाजकी संस्थापक अध्यक्ष तथा ग्रामथान संरक्षण समितिकी सदस्य सिता थरुनीले जानकारी दिएकी हुन् ।
सौनधामि ग्रामथान ब्यवस्थापन समितिका अध्यक्ष वसन्त चौधरीको सभापतित्वमा आयोजित कार्यक्रममा थारु कल्याण कारिणी सभा (थाकस) जिल्ला कोषाध्यक्ष तारा चौधरी, पत्रकार धिरेन्द्र चौधरी, थाकस रामधुनी नगर सभापति राजकुमार चौधरी, थारु महिला उत्थान समाजकी अध्यक्ष आशा चौधरी, थारु महिला सभा रामधुनी नगर अध्सभापति लिलि चौधरी, थाकस रामधुनी १ नं. वडा सभापति सुनिता चौधरीले साँस्कृतिक पक्ष मौलिक रुपमै संरक्षण हुनुु पर्ने धारणा ब्यक्त गरेका थिए ।
तालिम घोङ्गही बगिया थारु भिलेज झुम्कामा भै रहेको आयोजकले जानकारी दिए भने तालिम १५ दिन बिहान ८ बजे देखि सुुरु हुने जनाएको छ ।
