राख संवाददाता
झुम्का, जेष्ठ २७ । सनेश कृषि सहकारी संस्था लि.ले शनिवार खसीबाख्राका लागि निशुल्क जुका नाम्ले र किर्नाको औषधी सहयोग गरेका छन् । प्राविधिक सहितको उपस्थितीमा खसीबाख्रामा लाग्ने रोग बिरुद्ध औषधी लगाउँदा तिन सय किसान लाभान्वित र उत्साहित भएका हुन् ।
किसानहरुमा उत्पादकत्व बृद्धि गर्न इटहरी उपमहानगरपालिको सहयोगमा बाख्रामा लाग्ने रोग बिरुद्ध औषधी बितरण गरेको सहकारीका अध्यक्ष राजदेव चौधरीले जानकारी दिए । औषधी लगाउँन इटहरी उपमहानगर वडा नं. १८ बडहरा गाउँका तिन सय बाख्रा पालक किसानले सेवा लिएका छन् । एकजना किसानले ५ वटा बाख्रामा औषधि लगाउँदा पन्ध्र सय खसीबाख्रामा औषधी सेवा पाएको अध्यक्ष चौधरीले जानकारी दिए ।
सो वडाका बाख्रापालन फर्मका किसानले समेत बाख्राहरुमा निशुल्क औषधी लगाएका छन् । २५ वटा बाख्रा पानल गर्दै आएका गोबिन्द चौधरीले बाख्रामा निशुल्क औषधी लगाउँन पाउँदा लागतमा बचत भएको बताए । किसानका समबन्धित सारोकार राख्ने संस्था सनेश कृषि सहकारीकोे सहयोगले किसानलाई प्रोत्साहन मिलेको भन्दै बाख्रा पालनमा आकर्षित हुने किसान चौधरीले बताए ।
बाख्रामा औषधी लगाउँन प्राविधिक मनिष कुमार कर्ण र सुरेन्द्र चौधरी रहेका थिए । बाख्राहरुमा औषधी लगाएपछि उत्पादन बढ्ने र किसानले फाइदा लिई आत्मनिर्भर बन्न सक्ने प्राविधिक कर्णले बताए ।
प्राविधिक कर्णका अनुसार बाख्राको उत्पादन क्षमतामा जीवाणु विषाणु बाहेक परजीवि जनित रोग व्याधीको अत्याधिक प्रभाव पर्दछ । परजीवी जनित रोग व्याधीहरु मध्ये खसीबाख्राको पेटमा पाइने जुका नाम्लेका कारण भोक कम लाग्ने, एनीमियाँ, पोषक तत्वको कमीले गर्दा उत्पादनमा कमी प्रजनन क्षमतामा ह्रास एवं समायानुसार उपचार नपाए मृत्यु समेत हुने गर्दछ । जसको कारण खसीबाख्रा पालकहरुलाई क्षति हुने गरेको प्राविधिक कर्णले बताए । तसर्थ खसीबाख्रामा भित्रि परजीवि नाम्ले जुका र बाहिर परजीवि किर्ना नासका लागि समयमा औषधि लगाउँनुपर्ने भएको सकहकारीले निशुल्क औषधि सहयोग गरेको बताए ।
