राख संवाददाता
झुम्का,असार २ । प्रथम रामधुनी महोत्सवमा बाल गायक सुप्रिम मल्ल र रिजन डाँगीको प्रस्तुती रहने जनाएको छ । सानो उमेरमै साङ्गीतिक क्षेत्रमा लोभलाग्दो ख्याति कमाएका बाल गायक मल्ल र डाँगी आज शनिवार महोत्सवमा गायन कला प्रस्तुत गर्ने आयोजक रामधुनी युवा क्लवले जनाएको हो ।
बाल गायक मल्लले दर्जनौं गीतमा आफ्नो सुमधुर स्वर दिइसकेका छन् । स्टेज कार्यक्रम र लाइभ दोहोरीमा समेत उनी निकै खोजिने बाल गायकमा पर्ने गरेका छन् ।
‘बिजुली’, ‘बिछोडको करौंतीले’, ‘ताराबाजी लै छोरा’ जस्ता केही गीतहरू गाएपछि सुप्रिम ‘द भ्वाइस अफ किड्स’ नेपाल’को पहिलो सिजनमा सहभागी भएका थिए । त्यसपछि भने उनको स्वरको चर्चा हवात्तै बढेको हो । उनी ‘भ्वाइस किड्स’को फाइनलसम्म पुग्न सफल भएका थिए ।
उनले ‘मेरो बाबा सुपरम्यान’, ‘देउरालीलाई भेटी’, ‘सम्झिराख है साथी’, ‘फोटो सिरानी’, ‘फोटो फिरिममा’, ‘रेलको बाटो’, ‘ओए काजल’, ‘फापरको पिठो’, ‘धोकेबाज हौ तिमी’ लगायतका थुप्रै गीतमा उनले स्वर दिएका छन् ।
यी मध्ये ‘फोटो फिरिममा’, ‘रेलको बाटो’, ‘ओए काजल’, ‘फापरको पिठो’, ‘धोकेबाज हौ तिमी’ सुप्रिमको स्वरमा चाइल्ड भर्सनमा सार्वजनिक भएका हुन् । चलचित्र ‘प्रेम गीत ३’को शीर्ष गीत ‘हर यूग होस’ समेत सुप्रिमको स्वरको चाइल्ड भर्सनमा सार्वजनिक भएको छ ।
यसैगरी अदभूत गायन क्षमता भएका रिजन डाँगी अन्तर्राष्ट्रिय फ्रेन्चाईज टेलिभिजन गायन रियालिटी शो ‘द भ्वाइस अफ किड्स’ दोश्रो सिजनको सेमिफाइनल सम्म प्रवेस गर्न सफल भएका थिए । सुनसरीको इटहरी स्थायी घर भएका डाँगीले फिल्म ‘प्रियसी’को उदित नारायण झाले गाएको ‘सय डाँडा काट चाहे’ बोलको गीत गाउँदै सेमिफाइनलमा प्रवेश गरेका थिए । शोको ब्लाईण्ड अडिसनबाटै अत्याधिक दर्शक श्रोताको मन जितिसकेका छन् ।
रिजन भारतीय चर्चित बाल गायन रियालिटी शो ‘सारेगमप लिटिल च्याम्प्स’ मा पनि सहभागी भएका थिए । उनले भ्वाइस अफ किड्स दोश्रो सिजनमा गाएका गीतका भिडियो क्लिपहरु सामाजिक संजालमा भाईरल भएका छन् ।
बाल गायन कलाले आज रामधुनी महोत्सव संगीतले गुञ्जयमान हुने आयोजक तथा महोत्सव संयोजक बिनोद चौधरीले जानकारी दिए । महोत्सव रामधुनी नगरपालिका १ नं. वडा कार्यालयको छेउ बुधवार र शनिवार लाग्ने साप्ताहिक हटिया नजिकै रहेको छ भने सहयोगीमा रामधुनी नगरपालिका र व्यवस्थापनमा गौतम बुद्ध अमुजमेन्टको रहेको छ ।
महोत्सव जेष्ठ १९ गते देखि असार ५ गते सम्म रहने आयोजक रामधुनी युवा क्लवले जानकारी दिएको छ । महोत्सवमा चर्चित राष्ट्रिय कलाकार, मोडल तथा चर्चित स्थानीय कलाकार तथा गायक गायिकाहरुको प्रस्तुती राख्दै आएको छ ।
