रामधुनी खबर संवाददाता
झुम्का, फागुन १० । मकै खेती उत्पादन बृद्धिका लागि बिहिवार रामधुनीमा आधुनिक कृषि औजार प्रदर्शनी गरेको छ । कृषकहरुका लागि मकै खेतीमा लागत कम र उत्पादन बृद्धि गर्न सगुन कृषि सहकारी संस्थाले मकै रोप्ने आधुनिक कृषि औजार रामधुनीमा प्रदर्शनी गरेको संस्थाका अध्यक्ष कमलकान्त राईले जानकारी दिए ।
प्रदर्शनीमा उपस्थित क्षेत्रिय कृषि अनुसन्धान निर्दैशनालय तरहराका इन्जिनियर डा.गोविन्द प्रसाद तिम्सिनाले मकै रोप्ने आधुनिक औजारले कृषकलाई ५० प्रतिशत लागत कम लाग्ने जानकारी दिए । त्यसैगरी उत्पादनमा २५ प्रतिश बृद्धि हुने इन्जिनियर तिम्सिनाले जानकारी दिए ।
मकै रोप्ने आधुनिक मेशिन खरिदका लागिरु २ करोड लागत लागेको संस्थाका अध्यक्ष राईले जानकारी दिए । भूमि व्यवस्था कृषि तथा सहकारी मन्त्रालय प्रदेश सरकारको रु ८० लाख अनुदान र बाँकी संस्थाले व्यहोरेको जानकारी दिए । संस्थाले मकै रोप्ने आधुनिक मेशिन एकवटा, तिनवटा ट्रयाक्टर, दुईवटा रिपर र एकवटा हारवेस्टर खरिद गरेको जानकारी दिदै कृषि औजारका लागि कृषकहरुलाई सहुलियत दरमा उपलब्ध गराउने संस्थाका अध्यक्ष राईले जानकारी दिए । संस्थाले कृषि यन्त्र परिचालन, सहकारी पसल, बचत तथा ऋण प्रवाह गर्दै आएको छ ।
मकै रोप्ने आधुनिक कृषि औजार प्रदर्शनी सहित रामधुनी वडा नं. २ को मिलन टोलमा अच्युत रेग्मीको १५ कठ्ठा र रामधुनी वडा नं. ९ छप्कीमा महेश चौधरीको एक बिगहामा मकै रोपेको छ । प्रदर्शनी कार्यक्रममा रामधुनी वडा नं. २ का वडा अध्यक्ष रामनारायण चौधरी लगायत स्थानीय कृषकहरुको उपस्थिती रहेको थियो ।