रामधुनी खबर संवददाता
झुम्का, चैत्र ११ । विश्व क्षयरोग दिवस २०२४ को अवसरमा शनिवार आज स्वास्थ्य शाखा रामधुनीले स्वास्थ्य सचेतना कार्यक्रम सम्पन्न गरेको छ । क्षयरोग प्राणघातक सरुवा रोग १ जना बिरामीले १० जनालाई सार्न सक्ने भएकोले समयमै उपचार गर्न सचेतना दिदै कार्यक्रम सम्पन्न गरेको हो ।
नगरप्रमुख शंकरलाल चौधरीको सभापतित्वमा उपप्रमुख तारा थापा, जिल्ला स्वास्थ्य शाखा प्रमुख सागर प्रसाईको उपस्थितीमा क्षयरोग बिशेष वक्तृत्वकला र सचेतना कार्यक्रम गरेको हो । रामधुनी नगरमा गत आर्थिक बर्षमा ८८ जना बिरामी पत्ता लागेको स्वास्थ्य शाखा रामधुनीले जनाएको छ । जसमध्ये ८ जनाको मृत्यु भएको छ । ६० जना फोक्सोको बिरामी देखिएको छ । क्षयरोग सुरुवा रोग भएकोले बिरामी बृद्धि हुन सक्ने चुनौतीको बारेमा रामधुनी स्वास्थ्य शाखा प्रमुख नगेन्द्र पौडेलले जानकारी दिए ।
क्षयरोग विरामी जाँच र उपचार गर्न नआउने हुँदा गाउँटोलमा लुकेको अवस्था रहेकोले सो बिरामीले धेरैलाई सार्न सक्ने चुनौती रहेको जनाए । यसका लागि स्वास्थ्य उपचार केन्द्रहरुको प्रयासले मात्र नभएर सर्व पक्षिय साझा प्रतिवद्धता हुन आवश्यक रहेको स्वास्थ्य शाखा प्रमुख पौडेलले उठान गरे ।क्षयरोग बिषयमा बिद्यार्थी स्तरमा सचेतना गर्ने उधेश्यले बिद्यालय स्तरीय वक्तृत्वकला प्रतियोगीताको समेत आयोजना गरेको थियो । प्रतियोगीतामा सहभागी बिद्यार्थीहरुले क्षयरोगको बारेमा भन्दै सर्नसक्ने अवस्था, लाग्ने कारण, लक्षण, समस्या, बच्ने उपायका बारेमा धारणाहरु राखेका थिए । वक्तृत्वकला प्रतियोगीतामा नगरका पाँच सामुदायिक विद्यालयका बिद्यार्थीहरुले सहभागी भएका थिए ।सहभागी मध्ये आदर्श मावि बक्लौरीका अनु ढकाल प्रथम, चन्द्रकमल माविका रजिना कटेल दृतिय, जनता मावि सिंगियाका अनुप पराजुली तृतिय र भासि माविका युनिक चौधरी र पंचायत मावि कुमरखतका विपासा धिताल सान्तवा भएको छ । क्रमश प्रथम, दृतिय, तृतिय र २ जना सान्तवना भएका प्रतियोगीहरुलाई जनही रु २५००, रु २०००, रु १५०० र रु ५००, रु ५०० गरी पुरस्कृत गरिएको छ ।
रामधुनी नगरपालिकाको आयोजनामा कार्यक्रमका लागि जिल्ला स्वास्थय कार्यालय सुनसरी, बिएनएमटी नेपाल, स्टोप टिबी साझेदारी, बागमती सेवा समाज नेपालको समन्वय गरेको स्वास्थ्य शाखा रामधुनीले जानकारी दिए । विश्व क्षयरोग दिवस प्रत्येक वर्ष मार्च महिनाको २४ तारिखका दिन मनाइने अन्तर्राष्ट्रिय दिवस हो। क्षयरोग को किटाणु (Mycobacterium tuberculosis) पत्ता लागेको घोषणा गरिएको दिन मार्च २४, को सम्झना स्वरुप यो दिन मनाउने गरिन्छ ।
