राख संवाददाता
झुम्का, बैशाख १ । जुरशितल र सिरुवा पर्वको मौलिक महत्व हराउँदै गएपछि थारु महिला सभा सुनसरीले एक कार्यक्रमगरी सामुहिक रुपमा मनाएको छ । धार्मिक तथा साँस्कृतिक रुपमा मानाउदै आएको पर्वको मौलिक महत्व उठान गर्दै थारु महिला सभा सुनसरीले सामुहिक जुरशितल र सिरुवा कार्यक्रम मनाएको हो ।
नव बर्ष सुरुवात सगै आदिवासी लगायत भुमिपुत्र थारु समुदायले मनाउने जुरशितल र सिरुवा पर्वको पौराणिक मान्यता बिर्सिदै गएकोले पुस्ताहस्तान्तरणकालागि मौलिक विधि अनुसार कार्यक्रमगरी जुुरशितल र सिरुवा पर्व मनाएको महिला जिल्ला अध्यक्ष सुशिला लेखीले जानकारी दिनु भयो । संस्कार अनुसार कार्यक्रममा थारु समुदायले सुख, शान्ति प्रगती तथा लामो आयुको कामना गर्दै ग्रामथान देवता घर, कुल देवतालाई जल अर्पण गरि आफु भन्दा ठुलो मान्छेको खुट्टामा तथा आफु भन्दा सानो मान्छेको शिरमा पानी छर्कीदै जुरशितल भन्दै जुरशितल सिरुवा पर्व कार्यक्रम २०७९ मनाएको लेखीले बताउनु भएको हो ।
डिहवार सिराथान, साँस्कृतिक भूमि, धार्मिक तथा साँस्कृतिक धरोहरहरु नीतिगत संरक्षण गर्नसमुदाय स्तरबाट सशक्त हुनुपर्ने कार्यक्रमका बक्ताहरुको सुझाव दिएका छन् । पर्वमा खाने परिकारहरुको समेत प्रर्दशनगरी अतिथीहरुमा स्वाद चखाएको अध्यक्ष लेखीले बताउनु भयो । परिकारमा कचरी, बरी, तेलपौर रोटी, माछा लगायतका परिकारहरुको प्रर्दशन गरिएको थियो । सो परिकार चैत्र मसान्तमा पकाएर बैशाख १ गते खादा शरीर बलियो र स्वास्थ्य रहने थारु समुदायमा बिश्वास रहेको छ ।
जुरशितल, सिरुवा, फगुवा, समाचखेवा, तिला संक्राईत, अखारी, नेमानी पर्वको महत्व उठानगरी संरक्षण गर्न थारु महिला सभा सुनसरी अग्रसर रहने छ भन्दै नगर तथा वडा महिला समिति समेत क्रियाशिल रहेको जिल्ला अध्यक्ष लेखीले बताउनु भयो । लेखीका अनुसार थारु महिला सभा रामधुनी नगर समितिले फगुवा पर्व तथा महिला सभा रामधुनी १ नं. वडा समितिले जुरशितल कार्यक्रमगरी क्रियाशिल रहेको छ, यसका साथै जिल्लाका प्रत्येक शाखाहरुलाई पर्व लक्षित कार्यक्रम गर्न गराउन सक्रिय बनाउदै जाने छौँ । पहिचान संग जोडिएको पर्वहरुलाई कार्यक्रम मार्फत उजागर गर्न सुशिला लेखीको नेतृत्वमा थारु महिला सभा सुनसरीले निरन्तरता दिदै आएको छ ।
२०७८ चैत्र २८ गते थारु महिला सभा सुनसरीले थारु साँस्कृतिक भूमि इटहरी उपमहानगर ५ पचरुखी ग्रामदेव थानमा मनाएको छ । कार्यक्रममा थारु कल्याणकारिणी सभा केन्द्रिय सदस्य उर्मिला चौधरीको प्रमुख आतिथ्यतामा सम्पन्न भएको हो । कार्यक्रममा थारु कानून व्यवसायिक सभा केन्द्रिय अध्यक्ष रामराज चौधरी, थारु पत्रकार संघ केन्द्रिय उपाध्यक्ष कुलदिप चौधरी लगायतका बक्ताहरुले साँस्कृतिक पर्वहरुको मौलिक महत्व उठान गर्न थारु महिला सभा थप अग्रसरता देखाउदै गएकोले सराहनिय ब्यक्त गर्दै निरन्तरताको शुभकामना दिएका छन ।