राख संवाददाता
झुम्का,चैत्र २७ । रामनवमीको दिन मर्यादा पुरुषोत्तम श्री राम चन्द्रको जन्म दिनको रूपमा लिइएको छ । त्रेतायुगमा आजकै दिन भारतको अयोध्यामा राजा दशरथ र रानी कौशल्यावतीको सुपुत्रका रूपमा विष्णुको अवतार लिएर भगवान् श्रीरामको जन्म भएको थियो । यसैको अवसरमा रामधुनी मन्दिरमा मनाइने मुख्य पर्व रामनवमीमा भक्तजनहरु श्रदाभक्ति पुर्वक धुनी दर्शन गरेका छन ।
रामधुनी नगरपालिका वडा नं. ४ मा रहेको ऐतिहासिक रामधुनी मन्दिरमा त्रेतायुग देखि बलेको अखण्ड धुनी भक्तजनहरुले दर्शन गरिरहेको पुजारी काशीदास उदासिनले बताउनु भयो । आज रामनवमीको दिन अखण्ड धुनी दर्शन गर्नाले चिताएको कार्य पूरा हुने र अर्को जन्ममा बैकुण्ठ वास हुने कुरा ‘व्रतार्क’ नामक धर्मग्रन्थमा उल्लेख छ ।
रामको कर्म थलो र रामले भ्रमण गरेको तथा धुनी बालेर बसेको स्थानका रुपमा रामधुनी भनिएको हो । रामनवमीलाई चैते दशैका रुपमा पनि लिने गरिन्छ । रामले लंकाका राजा रावणलाई बध गरेको दिन मानी रामनवमी पर्व मनाउने चलन पनि रहेको छ । धुनी वनमा अधि रामनवमी पर्व अलग रुपमा मनाउने चलन थिएन । बिशेष पूजा मात्र गरिन्थ्यो । मन्दिरमा बिशेष २०३९ साल पछि मात्र यहा बिशेष पुजा गर्नुका साथै मेलाको सुरुवात गरेको काशिदास उदासिनले बताउनु भयो ।
रामधुनीको कलावस्तुहरुमा धुनी मन्दिर,सिताकुण्ड,दरबार मन्दिर(लङगौट मन्दिर), मनचिन्ते चिमटा,कन्ना घर,तुलसा मठ,फलामे चक्का, चन्द्रमन्दिर, बनखण्डी तपस्थल, पुरानो इनार सो इनार १८८९ तिर तिरदास महन्तका पालामा बनेको हो । यसैगरी कमण्डलु कुण्ड, गौशाला, जाँतो, नगरा लगायत कलावस्तुहरु रहेको छ ।