राख संवाददाता
झुम्का, बैशाख ३ । राष्ट्रिय परिचयपत्र तथा पञ्जीकरण विभागले व्यक्तिगत घटना दर्ता सप्ताह सुरु गरेको छ । ‘सबैले व्यक्तिगत घटना दर्ता गरौं, गराऔं’ नारा सहित २०७९ बैशाख १ गते देखि ७ गते सम्म देशैभरी सुरु भएको हो ।
सप्ताह अन्तर्गत रामधुनी नगरपालिकाले सम्पुर्णमा व्यक्तिगत घटना दर्ता गर्न आव्हवान गरेको छ । वडा कार्यालय तथा नगरपालिकामा आफ्ना निजी घटना स्थानीय पञ्जिकाधिकारीकोमा गई दर्ता गराउन सकिन्छ । जन्म, मृत्यु, बसाई सराई, विवाह र सम्बन्ध विच्छेद दर्ता जस्ता व्यक्तिगत घटना दर्ता गर्न सकिन्छ । त्यसैगरी योग्यता पुगेका लाभग्राहीले सामाजिक सुरक्षा भत्ता प्राप्त गर्नकालागि विवरण समेत दर्ता गराउन सकिन्छ ।
व्यक्तिको जन्म, मृत्यु, विवाह, सम्बन्ध विच्छेद तथा बसाईँ सराईँ जस्ता मानिसका आफ्ना निजी घटना स्थानीय पञ्जिकाधिकारीकोमा गई दर्ता गराउने र प्रमाणपत्र लिने कार्यलाई व्यक्तिगत घटना दर्ता भनिन्छ । व्यक्तिले राज्यबाट पाउने सेवा सुविधा र हक स्थापनाका गर्न कानून बमोजिम गर्ने व्यवहारका लागि व्यक्तिगत घटना दर्ताका प्रमाणपत्र जरुरी हुन्छ ।
दर्ता सप्ताह संचालनमा फरक क्षमता भएका नागरिक, गर्भवती महिला, वृद्धवृद्धा तथा लोपोन्मुख जातिलाई विशेष प्राथमिकता दिन सम्बन्धित सबैलाई अनुरोध गरिएको छ । व्यक्तिगत घटना दर्ता र सामाजिक सुरक्षाभत्ता सम्वन्धिकुनै गुनासो भएमा दर्ता सप्ताह संचालन समयमा गुनासो समेत दर्ता गर्न सकिन्छ ।
निजी घटना गर्ने स्थानीय पञ्जिकाधिकारी नगरपालिकाहरुका हकमा वडा सचिव र वडा सचिव नभएको अवस्थामा पञ्जिकाधिकारी (रजिस्ट्रार) को सहमतिमा नगरपालिकाको सचिवले तोकेको स्थानीय निकायको कर्मचारी हुन् । गाउँपालिकाको हकमा गा.पा.को सचिव र गा.पाको सचिव नभएको अवस्थामा पञ्जिकाधिकारी (रजिस्ट्रार) ले तोकिदिएको स्थानीय निकायको कर्मचारी हुन् ।