चन्द्रकला चौधरी
झुुम्का,भदौ २१ । भगवान विष्णुको आठौँ अवतारको रूपमा श्री कृष्णको जन्मदिनको अवसरमा बिहिवार रामधुनीको झुम्का बजारमा रथयात्रा गरिएको छ । झुुम्का उद्योग बाणिज्य संघ रामधुनीको आयोजनामा झुम्केश्वर मन्दिरबाट सुरुगरी बजार परिक्रमा गर्दै रथयात्रा सम्पन्न गरेको हो ।
रथयात्रामा नेपाल राष्ट्रका प्रथम ऐतिहासिक जगतगुरु अनन्त श्री बिभुषित जगतगुरु श्री बालसन्त मोहनशरण देवाचार्य महाराज श्री को सहभागीता रहेको थियो । झुम्काको रथयात्रा १९ औँ रथयात्रा रहेको छ । भगवान श्री कृष्णको रथयात्राले झुम्का बजार धार्मिक साँस्कृतिक पहिचानमा प्रवद्र्धन भएको छ । रामधुनी नगर भगवान श्री रामको ऐतिहासिक पावन भूमिमा थप धार्मिक पर्यटनका लागि उठान समेत भएको छ ।
रथयात्रा झुम्केश्वर मन्दिरबाट सुरु गर्दै लगुनाचोक, कान्छीचोक, शिवचोक हुँदै पुनःझुम्केश्वर मन्दिरमा समापन गरेको छ । रथयात्रामा धार्मिक संघसंगठनहरुको बृहत सहभागीता रहको थियो । सनातन हिन्दुधर्मको झण्डा सहित भक्तजनहरुको सहभागाीताले रथयात्रामा रौनकता थपेको थियो । विभिन्न समुदायका साँस्कृतिक झाँकीले रथयात्राको भब्यता प्रदान गरेको थियो ।
यसैगरी झुम्काको जितमहान चोकमा साँस्कृतिक भक्तिसंगीत गर्दै कृष्ण जन्मअष्टमी मनाएको छ । भक्तिसंगीत संगै कृष्ण जन्मअष्टमी मेला यस बर्ष समेतको ३५ औँ पटक मनाएको शान्ति चौधरीले जानकारी दिइन् । बुुबा स्वर्गीय हरिनारायण चौधरी र आमा पवनी थरुनी उहाँहरु गाउँटोल सम्पूर्णमा कल्याणका लागि मनाउँदै आएको कृष्ण जन्मअष्टमी निरन्तरता दिदै यस पटक अष्टजाम सहितको भक्तिसंगीत कार्यक्रम गरेको महेश चौधरीले बताए ।
कृष्ण जन्माष्टमीलाई सातम आठम, गोकुलष्टमी, अष्टमी रोहिनी, श्रीकृष्ण जयन्ती, श्री जयन्ती वा कहिलेकाही साधारण भाषामा जन्माष्टमी भन्ने गरिन्छ । भगवान विष्णुको आठौँ अवतारको रूपमा श्री कृष्णको जन्मदिनको अवसरमा मनाइने वार्षिक पर्व हो । कृष्णा जन्माष्टमीमा भगवान श्री कृष्णको पूजा–आराधना गरी श्रद्धा–भक्तिपूर्वक मनाउँछन् ।
ज्ञानयोग, कर्मयोग र भक्तियोगका प्रणेता भगवान श्रीकृष्णको जन्म द्वापरयुगमा हिन्दू पञ्चाङ्ग अनुसार भाद्रकृष्ण अष्टमीको मध्यरातमा भएकाले उक्त दिनलाई श्रीकृष्ण जन्माष्टमी र रातलाई मोहरात्री भनिन्छ । अन्याय, अत्याचार र राक्षसी प्रवृत्तिबाट मानवमात्रको संरक्षण गर्न भगवान् विष्णुको आठौँ अवतारको रूपमा जन्मेका श्रीकृष्णले आजीवन सत्यको पक्षमा रही सत्कर्मका लागि मानव समुदायलाई प्रेरित गरेका थिए । बाल्यकालदेखि नै आफ्ना विचित्र लीला देखाएका श्रीकृष्णले पुतना, कंस, जरासन्ध, शिशुपालजस्ता दानवी प्रवृत्तिको संहार गरेका थिए ।
