राख संवाददाता
झुम्का,असार ११ । रामधुनी नगरपालिकाले शुक्रवार नीति तथा कार्यक्रम र बजेट ल्याएका छन् । आगामी आर्थिक बर्षकालागि ल्याएको बजेटमा कृषि क्षेत्रको विकास प्राथमिक्तामा राखेको छ ।
नगरमा मुख्य कृषि पेशामा अबद्ध रहेकाले कृषि उत्पादनमा आत्मनिर्भर बनाउन नीति तथा कार्यक्रम र बजेट प्राथमिक्तामा राखेर रु १ करोड ९५ लाख २० हजार विनियोजन गरेको छ । पर्यटन र पुर्वाधार, समृद्ध रामधुनीको आधार भन्ने दिर्घकालिन सोचलाई सार्थक बनाउन कृषि पुर्वाधार र व्यवसायलाई आधुनिकीकरण तथा यान्त्रिकरण सहित उत्पादन बृद्धिगरी आत्मनिर्भर बनाउने नीति लिएको छ ।
कृषि उत्पादन तथा उत्पादकत्वमा अभिबृद्धि तथा कृषि क्षेत्रमा युवा परिचालन गर्ने प्रमुख प्राथमिक्तामा राखेको छ । स्थापना भएको धान बाली,माछा,मकै पकेट विकास कार्यक्रममा क्रमश रु ६ लाख, रु ७ लाख, रु १२ लाख विनियोजन गरेको छ । किसान सुचिकरण,खाद्यान्न बालीको उन्नत बिउँ उपयोग अनुदान,धान बाली प्रवद्र्धन कार्यक्रम,उन्नत बिउँ वितरकलाई प्रोत्साहनको बजेट सहित लक्ष्य लिएको छ ।
रामधुनी ६ ढेरीगाउँ, बक्लौरी, वडा नं. ८ र ९ को डुम्राहामा कृषि बजार निर्माण गर्न रु ६० लाख बजेट सहितको योजना रहेको छ । अनुदानमा मकैको बिउँ वितरण,कौशी तरकारी खेती विस्तार,७५ प्रतिशत अनुदानमा इलेक्ट्रोनिक मोटर सहित बोरिङ्ग जडान,५० प्रतिशत अनुदानमा पावर टिलर वितरण, ७५ प्रतिशत अनुदानमा बर्खे फलफुल वितरण, ७५ प्रतिशत अनुदानमा नाप तौलका सामाग्री वितरण गर्ने बजेट सहितको योजना ल्याएको छ ।
प्शुपन्छी क्षेत्रकालागि वडा तथा नगरपालिका स्तरीय विभिन्न योजना तथा कार्यक्रमकालागि रु ७६ लाख ५० हजार बजेट विनियोजन गरेको छ । जस्मा गुणस्तरीय स्वच्छ र दिगो पशुपन्छी जन्य उत्पादन, सुरक्षा सहितको खाद्य सम्प्रभुता, कुपोषणको समस्या न्युनिकरण, स्वच्छ एवं गुणस्तरीय पशुपन्छीजन्य उत्पादनका माध्यमबाट रामधुनीलाई आर्थिक, खाद्य तथा पोषणमा आत्मनिर्भर बनाउने लक्ष्य लिएको छ ।