चन्द्रकला चौधरी (रामधुनी खबर पत्रिका सम्वाददाता)
झुम्का, जेष्ठ १५ । कोभिड महामारीको दोस्रो लहरबाट प्रभावित पत्रकारहरुलाई तत्कालै राहत प्रदान गर्ने उधेश्यले थारु पत्रकार संघ केन्द्रियले आर्थिक सहायता कोषको स्थापना गरेको छ । केन्द्रियको भर्चुअल बैठकमा अध्यक्ष सन्तोष दहितले सनिवार कोषको स्थापना भएको जानकारी दिदै स्वइच्छाले सहयोग गर्नहुन पनि अनुरोध गरेका छन् ।
कोभिडकै कारण ज्यान गुमाएका र समस्यामा परेका पत्रकारहरुलाई सहयोगकालागी कोष स्थापना गरेको अध्यक्ष दहितले जानकारी दिए । सहयोग गर्नुहुने इच्छुकले थारु पत्रकार संघ नेपालको राष्ट्रिय वाणिज्य वैंक लि. पुतली सडक शाखामा रहेको खाता नं. ११३०१००००३४०५००१ मा पठाउन सकिने बताएको छ । थारु पत्रकारहरु ७ जना कोभिड संक्र्रमित भएको बैठकमा जानकारी दिए । संक्रमणबाट एकजनाको मृत्यु र दुर्घटनाबाट एक जना गरी दुई थारु पत्रकारको निधन भएको छ । रुपन्देहीका पत्रकार हिक्मत चौधरीको कोभिड संक्रमित भएपछि उपचारकै क्रममा जेठ ५ गते निधन भएको थियो । त्यस्तै, कपिलवस्तुका पत्रकार सञ्जय चौधरीको दुर्घटनामा परी वेैशाख ३० गते निधन भएको सम्बन्धित जिल्लाका पत्रकारहरुले जानकारी दिएको हो ।
केन्द्रिय अध्यक्ष सन्तोष दहितको सभापतित्वमा भएको भर्चुअल बैठकमा कोष स्थापना सहित केन्द्रियको पाँचौ अधिवेशन गर्ने, बिधान संशोधन लगायत महामारीबाट सुरक्षित रहने बिषयमा छलफल भयो । छलफलमा सल्लाहकार लक्की चौधरीले थारु पत्रकारहरु पत्रकारीतामा आफनै बल बुताले ठाउँमा पुगेको र कृयाशिल रहेको बताए । आर्थिक सहायता कोष खडा गर्नुमा थारु पत्रकारहरुलाई प्रोत्साहन मिल्ने सल्लाहकार चौधरीले बैठकमा बताए । कोभिडबाट स्वयम आफुनै संक्रमित भएकोहुदा यसबाट सिकाई पनि भएको चौधरीको भनाई रहेको थियो ।
भर्चुअल बैठकमा सुनसरीबाट अध्यक्ष सुनिल चौधरी, गवन चौधरी, कुलदिप चौधरी, सुक्देव चौधरी, कमला चौधरीले कोभिड प्रभावित पत्रकार र मिडिया हाउस संचालनकालागी केन्द्रिय तथा जिल्ला समितिबाट स्थानियतह तथा संघ संगठनहरुमा समन्बय गर्नु पर्ने उठान गरेका थिए । बैठकमा संघका अध्यक्ष सन्तोष दहित, उपाध्यक्ष उन्नति चौधरी, महासचिव सन्तकुमार चौधरी, सचिव कमल चौधरी, पुर्व उपाध्यक्ष प्रदिप लेखी, कृष्ण सर्वहारी लगायतका मोरंग, सुनसरी, सप्तरी, चितवन नवलपुर, रुपनदेही, कपिलबस्तु, बाँके, बर्दिया, कन्चनपुर, कैलालीका पत्रकारहरु जिल्लाका अवस्थाका बारेमा जानकारी दिएका थिए ।
