राख सम्वाददाता
झुम्का, साउन १४ । रामधुनी वडा नं. २ करमैनियाटोल स्थित दैनिक २०० लिटर अबैध घरेलु मदिरा उत्पादन गर्ने भट्टीमा बिहिवार प्रहरीले छापा मारेको छ । करमैनिया टोलको मुसहरीटोलमा मदिरा उत्पादन गरिरहेकै अवस्थामा इलाका प्रहरी पकलीकोे टोलीले छापा मार्दै भट्टीलाई बन्द गराएको हो ।
एकै घरमा ८ वटा भट्टी संचालनगरी दैनिक दुई सय लिटर घरेलु जाड, रक्सी उत्पादन गर्दै आएको थियो । प्रहरीले भट्टीबाट १ सय बढी ध्युको भाडोमा राखिएको कच्चा पदार्थ र करिब १ सय लिटर तयारी मदिरा जफतगरी नष्ट गरेको छ । मदिरा र कच्चा पदार्थ सुनसरी खोलामा नष्ट गरिएको प्रहरीले जानकारी दिएको हो । एउटै घरमा बसेर ५ जना परिवारले मदिरा जन्य पदार्थ उत्पादन गरेको पाएको छ । सो घरबाट मदिरा बनाउन राखिएको ८ किलो मार्चा समेत भेटिएको छ । ४५ बर्षिय पञ्चु राई, मन्जु कुमारी राई, मनिषा राई लगायत नाम भन्न नचाहेका ५ परिवारले मदिरा उत्पादनगरी रामधुनी नगरभरीका पसलमा पुर्याउने गरेको प्रहरीले जनाकारी दिए ।
वडा नं. २ का वडाअध्यक्ष रामनारायण चौधरीका अनुसार भट्टी संचालकलाई कार्वाही गर्नु पर्ने बताए । मदिरा उत्पानले क्षणिक रुपमा दुइ चार जनालाई फाइदा होला तर यसले समाजलाईनै नाकारात्मक तर्फ लाने भएकोले भट्टी बन्दगरी कार्वाही गर्नु पर्ने वडा अध्यक्ष चौधरीको भनाई रहेको छ । रामधुनी वडा नं. २ बालमैत्रि वडा घोषणा गरिसकेको छ । सोही वडामा यति मात्रामा मदिरा उत्पादन गरिरहदा पनि वडा कार्यालयको ध्यान नजानु बालमैत्रि वडाकालागी चुनौती थपिएको छ ।
