चन्द्रकला चौधरी
झुम्का, असोज १० । बाल बच्चा घरपरिवारको सुख शान्तिको कामना गर्दै तराई महिलाहरु धार्मिक आस्थाले मान्दै आएको जितिया पर्व यस बर्ष पनि बिविध कार्यक्रम गरि मनाउने भएका छन् । संरक्षणको अभावले पर्वको कतिपय विधिहरु हराउदै गइरहेको हुदा थारु महिला अधिकार संघ, संगठनले नीतिगत संरक्षण हुनुपर्ने जोड दिदै कार्यक्रम गर्ने तयारी गरेका हुन् ।
जितिया पर्व तिथिले असोज कृषण पक्ष सप्तमी देखीे नवमी सम्म मनाउने परमपरा रहेको छ । सो अनुसार २०७८ को आउदो असोज १३ गते परेको छ । यसै अवसरमा थारु महिला सभा सुनसरीले असोज १२ गते कार्यक्रम आयोजनागरी मनाउने भएको हो । इटहरीको दुर्गा पार्टी प्यालेसमा आयोजना गर्ने सभा सुनसरीले जानकारी दिएको छ । कार्यक्रम बिश्व त्रसित कोरोना महामारीको मध्यनजर गर्दै भिडभाड नगरी छोटो रुपमा कार्यक्रम गर्ने र सो कार्यक्रमबाट जितिया पर्वको संरक्षण बिषयमा राज्यको दायित्व बोध गराउन सुझाव, बिचार, धारणा संकलनगरी प्रदेश र स्थानीय सरकारलाई माग पत्र हस्तान्तरण गर्ने जिल्ला अध्यक्ष सुशिला लेखीले जानकारी दिइन् ।
झुम्का स्थित थारु महिला उत्थान समाजको आयोजनामा जितिया पर्व नीतिगत रुपमा संरक्षण र प्रवद्र्धन गर्न एक दिवसिय कार्यक्रम गर्ने भएको छ । गाउँटोलमा भाइरल ज्वरो, कोरोना महामारीको बढ्दो अवस्थालाई हेर्दै छोटो रुपमै कार्यक्रम आयोजना गर्ने जानकारी दिएको छ । स्वास्थ्य मापदण्ड अपनाउदै सुरक्षितका साथ सुनसरीका जनप्रतिनिधिहरुको सामुहिक भेला गराउदै अन्तरकृया, संवाद र छलफलगरी आएको निष्कर्षमा नीतिगत संरक्षणको माग गर्ने अध्यक्ष सिता थरुनीले जानकारी दिइन् । कार्यक्रम पश्चात पर्वको मान्यता धार्मिक तथा पौराणिक कथा वाचन हुने समेत बताएको छ । कार्यक्रम असोज १३ गते रामधुनी वडा नं. १ जितमहान चौकमा कार्यक्रम आयोजना गर्ने जनाएको छ ।
इटहरी उपमहानगरपालिका वडा नं. ८ टेंग्राटोलमा पौराणिक मान्यता अनुसार ब्रतालु महिलाहरु भेला भएर जितमहानको मुर्ति राख्ने, भजन किर्तन, कथा वाचन, बिधिवत पुजाँ अर्चनागरी मनाउने तयारी गरेको छ । “अहिले नयाँ पुस्ताले पौराणिक मान्यतालाई बिर्सिदै गएको र नाच गानमा केन्द्रित रहेर कार्यक्रम गरिरहेकाले जितिया पर्वको पहिचान र जितियाको कतिपय बिधि लोप हुदै गइरहेको छ, तसर्थ पहिलेको जितिया पर्व मनाउने संस्कार अनुरुप कार्यक्रमको आयोजना गर्ने छौँ” भन्दै साबित्री चौधरीले जानकारी दिईन् । कार्यक्रम टेंग्राटोल बिच्छु धामी ग्रामथानको प्राँगनमा मनाउने ग्रामथान संरक्षण समितिले जानकारी दिएको छ ।