राख संवाददाता
झुम्का, जेष्ठ १४ । रामधुनी नगरपालिकाको नव निर्वाचित जनप्रतिनिधिहरुलाई नगरपालिका र वडाका सेवा प्रवाहमा गरिने काम, कर्तव्य र अधिकार बारेमा तालिम दिन सुरु गरेको छ । नगरप्रमुख, उपप्रमुख, वडाअध्यक्ष तथा वडासदस्यहरुलाई स्थानीय सरकार सञ्चालन तथा स्थानीय विकास सम्बन्धी रामधुनी नगरपालिकाले शनिवार देखि ३ दिने तालिम सुरु गरेको हो ।
संविधान, नियम तथा प्रचलित कानूनी व्यवस्था अनुसार पालिका तथा वडा तहबाट प्रवाह गरिने सबै प्रकारका सेवा तथा सुबिधाहरुलाई नियमित, पारदर्शी, जनअपेक्षा बमोजिम सुशासनयुक्त बनाउन अभिमुखिकरण सहित तालिम संचालन गरेको नगरपालिकाका योजना शाखाका हर्षलाल चौधरीले बताउनु भयो ।
तालिमले व्यावहारिक समस्या र समाधानका विषयमा जानकार हुने, जन अपेक्षित योजना, खरीद सेवा प्रवाह, विकास निर्माण, सुशासन, नैतिक आयामहरुको कानूनि तथा प्रक्रृयागत बिषयहरुमा जानकार भई जनप्रतिनिधिहरुले कुशल दायित्व निर्वाह गर्न सक्ने जनाएको छ । तालिममा सहजिकरण प्रमुख प्रशासकिय अधिकृत कमल थापा, सुवोध निरौला, कानून व्यवसायी प्रदिप काफले, लेखा अधिकृत बिरेन्द्र सिग्देलले गरिरहेको योजना शाखाका चौधरीले जानकारी दिनु भयो ।