राख संवाददाता
झुम्का,असोज २७ । रामधुनी नगरपालिकाको नयाँ प्रमुख प्रशासकीय अधिकृतमा बिहिवार रामधुनी वडा नं. ७ की दिक्षा कुमारी भगत पद बहाली हुनुभयो । मेयर शंकरलाल चौधरी र उपमेयर तारा थापाले स्वागत गरेपछि नयाँ पद बहाल भएको प्रमुख प्रशासकीय अधिकृतबाट नगरपालिकाको प्रशासनिक कार्यहरु संचालन भयो ।
नगरपालिकामा बिहिवारका दिन लेखा शाखाका लागि २ वटा र घरनक्साका लागि १ वटा आएको निवेदनमाथी हस्ताक्षर गर्नुभयो । दिक्षा कुमारीको हस्ताक्षर गरेको निवेदन सम्बन्धित शाखामा लगियो । नयाँ प्रमुख प्रशासकीय अधिकृत दिक्षा कुमारीले हस्ताक्षर गरेको निवेदनको सिफारीस लेखा शाखा र घरनक्सामा पछि समेत मिलाउँनेगरी कार्यन्वयन भयो ।
किशोरी तथा महिलाहरुले नेतृत्वमा कुशल कार्य संचालन गर्न सक्छन् भन्ने उधेश्यले दिक्षा कुमारी भगतलाई एक दिनको प्रमुख प्रशासकीय अधिकृतको रुपमा लिएको थियो । प्रमुख प्रशासकीय अधिकृत कमल थापाले सहज रुपमा वर्तमान अधिकृत दिक्षा कुमारीलाई योजनाका बारेमा बुझाउँदै थापा निवर्तमान अधिकृत भएका थिए । किशोरी तथा महिला नेतृत्व अनुभव र प्रोत्साहनकालागि अधिकृत थापाकै रोहवरमा निवेदनहरु हस्ताक्षरगरी पठाएको थियो ।
अन्तराष्ट्रिय बालिका दिवसको अवसरमा रामधुनी नगरपालिकामा बालिका नेतृत्व र यसैसन्दर्भका कार्यक्रमहरु गर्दै आएको छ । गतबर्ष एक जना बालिकालाई मेयर पद धारणगरी एक दिनकालागि नेतृत्व गराएका थिए । यस बर्ष प्रमुख प्रशासकीय अधिकृतको रुपमा प्रोत्साहन गरेको छ ।
मेयर चौधरीको सभापतित्वमा आयोजित कार्यक्रममा प्रमुख प्रशासकिय अधिकृत थापाले बालमैत्रि स्थानीय शासन घोषणा गरेको नगरमा बालबालिकालाई नेतृत्वमा प्रोत्साहनका लागि यस प्रकारका कार्यक्रमहरु आयोजना गर्न आवश्यक रहेको बताउँनु भयो । उहाँले प्रमुख प्रशासकिय अधिकृत निजामति सेवा हुन् । यसका लागि लोक सेवा मार्फत अधिकृत हुन सक्ने प्रकृयाको बारेमा जानकारी दिनु भएको थियो ।
किशोरी तथा महिला नेतृत्व विकासमा नगरपालिका प्रतिबद्ध रहेको उपमेयर तारा थापाले बताउँनु भयो । नगरपालिकाबाट महिला लक्षित कार्यक्रमहरु विनियोजित रहेकोले समाजमा महिलाहरुको दयनीय अवस्था सुधार हुने अपेक्षा गर्नु भयो ।
बालिका विरुद्दका बलात्कार र यौन हिंसा जस्ता अपराधहरुको उजुरी बढ्दो क्रममा छ । हाम्रा सामु बालिकाहरुको विभेद र असमानताका अन्य विविध आयामहरु विद्यमान रहेकाछन् । यसका लागि बालबालिका सम्बन्धि ऐन २०७५ को तत्काल कार्यान्वयन, बालिका लक्षित कार्यक्रमहरुको विस्तार, स्थानीय तहमा बाल अधिकार समितिको गठन तथा परिचालन अत्यन्त जरुरी रहेको भन्दै बालिकाहरुको अवसर प्रबर्द्धन गर्ने, उनीहरुको सशक्तिकरण गर्दै समतामुलक, न्यायपुर्ण समृद्द बनाउँन कोकन संस्थाबाट मेयर चौधरीलाई प्रतिवेदन समेत बुझाएको छ ।
हालमा पनि समाजमा बालिका तथा महिला कमजोर हुन्छन् भन्ने मानसिक्ताबाट हेरीरहेकाले सोच परिवर्तन गर्न किशोरी तथा महिलाहरुले नेतृत्व समहाल्न सक्छन् भन्ने प्रोत्साहनका लागि कार्यक्रममा एक दिनको प्रमुख प्रशासकीय अधिकृत बनाएको कोकन संस्थाकी निलम चौधरीले जानकारी दिनुभयो ।
प्लान इन्टरनेशनलको सहयोगमा साँझा सवालका लागि साँझा मञ्च (कोकन) संस्थाले १० औ अन्तराष्ट्रिय बालिका दिवसको अवसरमा सो कार्यक्रमको आयोजना गरिएको थियो । कार्यक्रममा शिक्षा शाखा, लेखा शाखा, बालबालिका शाखा, स्वास्थ्य शाखा, बालहेल्प डेक्स शाखाका प्रमुखहरु, कोकनकी निलम चौधरी र बराहक्षेत्र कोकन संयोजक लक्ष्मि परियारको उपस्थिती रहेको थियो ।