राख संवाददाता
झुम्का, कार्तिक १२ । रामधुनी नगरपालिकाले नागरिकलाई सूचना तथा प्रविधिसँग जोड्दै स्क्रिनटच डिजिटल वडापत्र संचालनमा ल्याएको छ । कार्यालयको गतिविधि छिटोछरितो सेवाग्राहीसामु सुसूचित गराउँन नगरपालिकाले स्क्रिनटच डिजिटल सूचना पाटी तथा नागरिक वडापत्र संचालनमा ल्याएको हो ।
आम नागरिकलाई सेवा प्रवाहको बारेमा जानकारी गराउन शुरु गरेको डिजिटल वडापत्रले सङ्घीयताको भावनाअनुरूप सुशासनको प्रत्याभूत गर्न सहज हुने कार्यालयले जनाएको छ । वडापत्रमा रामधुनी नगरपालिकाकोे प्रशासन सेवा, पदाधिकारी कर्मचारी विवरण लगायतका नगरपालिकाले प्रवाह गरेका विविध पक्षमा आम सेवाग्राहीलाई डिजिटल प्रणालीबाट नागरिक वडापत्रमार्फत पारदर्शी गराइएको कार्यालयका सूचना अधिकारी वसन्त मोतेले बताए ।
उनका अनुासर विद्युतीय प्रणालीको नागरिक वडापत्रबाट आफैले स्क्रिनटचगरी सेवाहरुबारेमा जानकारी लिन सकिने जनाए । नगरपालिकाको गतिविधिको साथसाथै नगर तथा वडाका योजना, नीति, बजेटको बारेमा समेत जानकारी लिन सकिने सूचना अधिकारी मोतेले बताएका हुन् ।
नागरिकलाई सूचना तथा प्रविधिसँग परिचित गराउनु स्थानिय सरकारको कर्तव्य र दायित्व हो । यस क्रममा डिजिटल नागरिक वडापत्रलाई पहिलो खुड्किलोको रुपमा हेर्न सकिन्छ । डिजिटल नागरिक वडापत्र जारीगरी रामधुनी नगरपालिकालाई स्मार्टपालिका बनाउँने प्रयासको अभ्यास रहेको सूचना अधिकारी मोतेको भनाइछ ।
सूचना अधिकारी मोतेका अनुसार डिजिटल नागरिक वडापत्रको बिशेषतामा स्क्रिनटच, स्मार्ट टिभी र नर्मल स्क्रिनले सजिलै प्रयोग गर्न सकिने बताए । वडापत्रलाई सम्पादन गर्न तथा नयाँ जानकारी सजिलै थप्न सकिन्छ । परम्परागत नागरिक वडापत्रमा रङ खुइलिने, मेटिने जस्ता भौतिक समस्याको समाधान भएको छ । प्रयोगकर्तालाई प्रयोग गर्न र बुझ्न सजिलो र सामान्यतया सलाइड शो गर्न सकिने अथवा स्क्रिनटचबाट आफुलाई चाहिएको जानकारी लिन सकिन्छ ।