राख संवाददाता
झुम्का,श्रावण १५ । लामखुट्टेको टोकाइबाट हुने डेंगीबाट बच्न रामधुनीको झुम्का बजार क्षेत्र र समुदायमा पुुगेर सचेतना गरेको छ । रामधुनी नगरपालिकाले सोमवार डेंगीबाट बच्ने उपायहरुको पर्चा, पम्प्लेट वितरण तथा ‘लार्भा खोज र नष्ट गर’ अभियान सुरु गरेको हो ।
नगरका विभिन्न क्षेत्रमा लामखुट्टेले अण्डा पार्नसक्ने सम्भावित स्थानको खोजी गरी लामखुट्टेको लार्भा नष्ट गर्न घरदैलो अभियान सुरु गरेको छ । नगरप्रमुख शंकरलाल चौधरी, उपप्रमुख तारा थापा लगायत वडा नं. १ र ५ का जनप्रतिनिधि, कर्मचारी, स्वास्थ्यकर्मी, झुम्का उद्योग बाणिज्य संघ, सेभ द अर्थ सुनसरी र स्थानीयवासी अभियानमा सहभागी भएका थिए ।
बजारमा जनचेतना अभियान गर्दै गर्दा होटल तथा चिसो बिक्री गर्ने पसलमा चिसो पेय पदार्थका शिशाका बोतलहरुमा पानी जमेको, भाडा, टायरमा पानी जमेको पाएको थियो । सो को सरसफाई तथा पसल धनीलाई सतर्कता अपनाउँन सचेतना गरेको थियो ।
अभियानको अवसरमा नगरप्रमुख चौधरीले अभियानलाई निरन्तरता दिने जनाउँदै सबै स्वास्थ्यका सवालमा नागरिक सचेत बन्नुपर्ने बताउँनुुभयो । पानी जम्ने ठाउँमा लामखुट्टेले लार्भा बनाउने भएकाले पानी जम्न नदिन निरन्तर सरसफाइको लागि जनचेतनामूलक अभियान अगाडि बढाइएको उहाँले जानकारी दिनुुभयो ।
नगरपालिकाको वडा नम्बर १ र ५ मा अभियान सञ्चालन गरिएको रामधुनी नगरपालिकाका स्वास्थ्य शाखा प्रमुख नगेन्द्र पौडेलले बताए । उनले बजार क्षेत्रमा अभियान सञ्चालन गरिएको जनाउँदै सबै वडामा यो अभियान सञ्चालन हुने जानकारी दिए । डेंगीको जोखिम कम गर्न र सावधानी अपनाउनका लागि समुदायमा पुगेर सचेतना जगाउने काम गरिएको उनको भनाइ छ ।
विशेषगरी वर्षाको पानी जम्ने जथाभावी फालेका बोतल, टिनका भाँडा, थोत्रो टायर, अलकत्रा वा मट्टितेलका खाली ड्रम, गमला, पानीका ट्यांकी आदिमा यो लामखुट्टेले फूल पार्छ । विशेषगरी साँझ–बिहानको समयमा सक्रिय हुने ‘एडिज एजिप्टी र एडिस एल्बोपिक्टस’ प्रजातिको लामखुट्टेको टोकाइबाट डेंगीको सङ्क्रमण फैलिने गर्छ ।
उच्च ज्वरो आउने, टाउको, आँखाको गेडी, ढाड, शरीर, घुँडाका जोर्नी दुख्ने, पिँडौलाको मासु दुख्ने आदि डेंगीका लक्षण हुन्। जटिल प्रकृतिको डेंगीको सङ्क्रमण भएका बिरामीमा थकान महसुस हुने, गिजाबाट रगत बग्ने, पेट असाध्यै दुख्ने, बारम्बार बान्ता हुने, सास फेर्न गाह्रो हुने, पेट र खुट्टा सुनिने जस्ता लक्षण देखा पर्छन् ।
