राख संवाददाता
झुम्का, श्रावण १७ । रामधुनी नगरपालिकाले दिगो तथा सम्मानित रोजगारीका लागि पेशागत बिल्डिङ्ग ईलेक्ट्रिसियन सिप विकास तालिम सुरु गरेको छ । हेल्भेटासको प्राविधिक सहयोगमा रामधुनी नगरपालिकाको रोजगार शाखाको समन्वयमा १० महिने निःशुल्क सिप विकास तालिम संचालनमा ल्याएको हो ।
तालिममा रामधुनी नगरका ४० जना युवाहरु सहभागी छन् । सहभागीहरुलाई बिहान र दिउँसो तालिम दिईने जनाएको छ । तालिम प्रभावकारीताका लागि सात महिना पढाई तथा तिन महिना अभ्यासगत गराउँने रोजगार शाखा प्रमुख खगेन्द्र सुुब्बाले जानकारी दिए ।
तालिमको सहजिकरण जयन टेक्निकल कलेज अफ टेक्नोलोजी प्रा.ली.बुटबल रुपन्देहीले लिएको छ । तालिम पिछडा वर्गको भवन रामधुनी वडा नं. १ भादगाउँमा संचालन भैरहेको छ ।
सिप विकास गरी स्वरोजगार बनाउँन मेसन सम्बन्धि ६ दिने तालिम अयोजना गर्ने जनाएको छ । यसैगरी मन्टेश्वरी, ब्युटिसियन लगायतका स्वरोजगार हुुने खालका तालिम आयोजना गर्ने रामधुनी रोजगार शाखाले जनाएको छ ।
दिगो तथा सम्मानित रोजगारीका लागि सीप परियोजनाले नेपाली कामदारहरू विशेषतः विपन्न समुदायका कामदारहरूको निरन्तर रोजगारीका लागि सीप अभिवृद्धि गर्ने तथा व्यापारिक र व्यावसायिक संस्थाहरूका लागि दक्ष कामदारको विकासमा सहयोग पुग्ने लक्ष्य लिएको छ ।
दिगो तथा सम्मानित रोजगारीका लागि सीप (इन्स्योर) परियोजना, नेपाल सरकार र स्वीजरल्याण्ड सरकारको द्विपक्षीय परियोजना हो । यो दोस्रो चरणमा प्रदेश सरकारद्वारा औद्योगिक प्रशिक्षार्थी (अप्रेन्टिशीप) तालिम कार्यक्रम सञ्चालन भएको तथा, व्यावसायिक तालिम (१६९६ घण्टाको कार्यगत अभ्यास सहितको तालिम) स्थानीय सरकारद्वारा सञ्चालन भइरहेको छ ।
