राख संवाददाता
झुम्का,भदौ ४ । आदिवासी नेवार समुुदायले सोमवार (आज) रामधुनी नगरको झुम्कामा लाखे ाच प्रदर्शनी गरेका छन् । कला, संस्कृतिको धनि आदिवासी नेवार समुदायको परम्परा अनुसार नाग पञ्चमीका दिन सुुरुवात गर्ने लाखेनाच झुम्का बजारमा झाँकी सहित प्रदर्शनी गरेका हुन् ।
लाखे नाच नेवार समुदायले कुनै विशेष जात्रा अथवा पर्वको उपलक्षमा लाखेको मुखुन्डो पहिरिएर गरिने परम्परागत नृत्य हो । लाखेनाच पञ्चमीका दिन सुुरुवातगरी कृष्ण जन्म अष्ठमीका दिन समापन गर्ने जनाएको छ । प्रदर्शनीमा गाई जात्रा समेतको समावेस गरिएको छ । झुम्केश्वर मन्दिरबाट झाँकी सुुरुगरी भमरीचोक, लगुनाचोक, लायन्सचोक हुँदै सम्पन्न गरेको छ ।
नेवाः देय् दवुनगर समिति रामधुनीको आयोजनामा संस्कृति संरक्षणको अभियानमा एकजुटताका लागि साँस्कृतिक झाँकी प्रदर्शनी गरेको जिल्ला उपाध्यक्ष केदार बजिमयले बताए । पौराणिक लाखे नाच धार्मिक आस्थाले महत्वपूर्ण रहेकोले रामधुनी नगर समितिले प्रत्येक बर्ष यसरीनै मनाउँने गरेको उपाध्यक्ष बजिमयले जानकारी दिए ।
कृष्णलाई मार्नका लागि कंसले बहिनी पुतनालाई प्रयोग गरेको र पुतनाको मृत्युको कामना गर्दै राक्षसको स्वरूपमा सजिएर नेवार समुदायमा लाखे नाच नचाउने गरिन्छ । नाग पञ्चमीका दिनबाट सुरु गरिएको पुतनाको मृत्युको कामना ऋषि पञ्चमीका दिन मृत्यु भएको सम्झँदै विर्सजन गरिने परम्परा छ । राक्षसको स्वरूपमा बनाइने खप्पर, कालिकाको वस्त्रसहित व्यक्तिलाई सिंगारेर लाखे नचाउने गरिन्छ ।
लाखे नाचमा ढोलक, ट्याम्को, सनाई, मजुरा लगायतका बाजा बजाइन्छ । भूतप्रेत नलागोस् र मरेको आत्माले दुःख नदेओस् भनेर यो नाच रातिमा देखाइने पुरानो कथन छ । टाउकोमा राक्षसको खप्पर लगाएर कालिकाको फरिया, ब्लाउजमा सजिएको व्यक्तिलाई स्याउलाको लुगा, बाँदरको खप्पर र बोराको पुच्चर बनाएको केटाकेटीहरुले जिस्क्याउँदै अनि लात्तीले हान्दै नाचिने यो नाच हेर्नसमेत निकै रोमाञ्चक हुन्छन् ।
लाखे नाचका क्रममा स्थानीय लोकभाका, वेषभूषा र चालचलन एवं रोपाइँ जात्रा, घोडे जात्रा, गाई जात्रा, राउटे जात्रा, वैरागी जात्रा र अन्य जात्रा देखाउँदै समाजका विभिन्न विकृतिमाथि व्यङ्ग्य प्रहार गर्ने र सर्वसाधारणलाई मनोरञ्जन दिने गरेको जिल्ला उपाध्यक्ष बजिमयले जानकारी दिए ।
