रामधुनी खबर संवाददाता
झुम्का, मंसिर १ । श्री छठमाता सेवा समिति रामधुनी नगर समितिले सुक्रवार झुम्कामा कलश यात्रा सम्पन्न गरेको छ । छठपर्वको पहिलो दिन पर्वको आगमनको स्वागत गर्दै बृहत उपस्थिती सहित समावेसी कलश यात्रा सम्पन्न गरेको हो ।
विभिन्न समुदायहरुको भेषभूषा झाँकी सहितको सहभागीतामा झुम्केश्वर मन्दिरबाट प्रारम्भगरी झुुम्का बजारको लगुनाचोक,शिवचोक सम्म कलश यात्रा गरिएको छ । पर्वको पहिलो दिन अर्थात ‘नहाय–खाय’को दिन पर्वको शुभआगमन र स्वागत हेतु कलश यात्राको आयोजना गरेको नगर समिति अध्यक्ष मिलन रौनियारले जानकारी दिए ।
कलश यात्राले रामधुनी नगर तथा झुम्का बजारमा पर्वको थप रौनकता बढेको छ । समावेसी सहभागीता सहितको कलशयात्राले पर्वको धार्मिक महत्व उठान गर्दै उल्लासमय बनाएको छ । नगर समिति अहिले छठघाट सजावटमा तिव्रता दिएको छ ।
समितिको आयोजनामा झुम्का बजारको नहर पुल पश्चिम सुनसरी,मोरंग सिंचाई आयोजनाको कोशी नहरमा १४० भन्दा बढी छठघाट निर्माणगरी ४५० घरपरिवारले पर्व मनाउँदै आएको छ । पर्वको आगमन पूर्व समितिले प्रत्येक बर्ष यसरी कलशयात्रा आयोेजना गर्दै आएको छ ।
पर्वको प्रारम्भ बर्तालुले आज ‘नहाय–खाय’ विधिबाट गर्दैछन् । कात्तिक शुक्ल तृतीयाकै दिन बर्तालुले उसिना चामल, कोदो, मुसुरो, माछामासुसहित तामसी र राजसी भोजन परित्याग गरी ‘अरबा–अरबाइन’ विधि बिहीबार नै गरेका हुन् । निरामिष (सात्विक) भोजन सुरु गरेर तृतीयाकै दिन व्रतको तयारी थाल्ने परम्परा छ ।
आज कात्तिक शुक्ल चौथीका दिन बर्तालुले पवित्र स्नान गरी व्रत सङ्कल्प गरेर चोखोनीतो खानेछन् । यो विधिलाई ‘नहाय–खाय’ भनिन्छ । श्रद्धा, निष्ठा र आत्मिक शुद्धीलाई अत्यन्त महत्व दिइने छठमा पूजा प्रसाद सामग्री ठकुवा (गहुँको पिठो र सख्खर मिसाएर शुद्ध घ्यूमा बनाइने खास परिकार), भुसुवा (कसार) र अन्य मिष्ठान्न परिकार ढिकी, जाँतोमा कुटिएको र पिधिंएको चामल र गहुँको पिठोबाट नै पकाइने परम्परा छ ।
पर्वमा सूर्यलाई अघ्र्य दिने र हात उठाउने समयमा ज्यामिर, बिमिरो, बोटसहित उखालिएको अदुवा, बेसार र फुर्को (पातगुवो) सहितको उखु आवश्यक सामग्रीमा पर्ने हुँदा पर्वविशेषमा यी कृषि उपजले राम्रो बजार पाउने गरेका छन् । बिहीबार कात्तिक शुक्ल त्रितीयाका दिन ‘अरबा–अरबाइन’ र आज (चौथी तिथि) ‘नहाय–खाय’ विधि गर्ने बर्तालुले शनिबार निराहार व्रत बसी राति सख्खरमा पकाइएको अरवा चामलको खिर कूलदेवता र छठीदेवीलाई चढाएर प्रसादस्वरुप खानेछन् ।
यो विधिलाई मिथिलामा ‘खरना’ भनिन्छ । बर्तालुले षष्ठी तिथिका दिन निराहार व्रत बसेर साँझपख मनोरम घाट बनाइएको जलाशयमा पुगी कम्मरसम्म पानीमा चोबलिएर अस्ताउँदा सूर्यलाई अघ्र्य दिएर प्रसाद राखिएको डाली हातमा उठाइ सूर्यलाई देखाइन्छ । यो व्रत आइतबार सम्पन्न गरिने छ ।
यो विधिलाई ‘सझुका अरख’ वा ‘सँझियाघाट’ भनिन्छ । यसरी ‘सझुका अरख’ मा देखाइएको प्रसाद सामग्रीको डाली सप्तमीका दिन बिहानै उदाउँदा सूर्यलाई अघ्र्य दिएर देखाइएपछि छठ सम्पन्न हुने परम्परा छ । यसपालि छठको समापन सोमबार बिहान सूर्योदयसँगै गरिने छ ।