रामधुनी खबर संवाददाता
झुम्का, मंसिर १३ । नेपाल सरकारबाट यस बर्ष यहि मंसिर ९ गते देखि २४ गते सम्म “लैङ्गिक हिंसा अन्तयको सुनिश्चता, महिला र बालबालिकामा लगानीको ऐक्यवद्धता” भन्ने राष्ट्रिय नाराका साथ अभियान मनाउन लागेको छ । सरकारबाट सामाजिक सचेतना सहित लैङ्गिक हिंसा बिरुद्धको अभियान संचालन गर्न आव्हान गरेको कार्यक्रम रामधुनी नगरपालिकाको वडा नं. २ र ४ नं. मा पनि सम्पन्न भएको छ । लैङ्गिक हिंसाको समस्या पहिचान, कानूनी परामर्श सहित सचेतना कार्यक्रम समपन्न गरेको हो ।
रामधुनी २ नं. वडामा आयोजित सचेतना कार्यक्रमबाट लैङ्गिक हिंसा के हो, हिंसा हुने अवस्था तथा कारण र यसका कानूनी उपचार गर्न सक्ने अवस्थाको बारेमा जानकारी दिएको कार्यपालिका सदस्य सुशिला ढुंगानाले जानकारी दिनुभयो । कार्यक्रमको अवसरमा वडा नं. २ का गर्भवती महिलाहरुलाई पोषण खानेकुरा समेत बितरण गरिएको छ ।
यसैगरी वडा नं. ४ मा थारु महिला सभा वडा समितिबाट लैङ्गिक हिंसा बिरुद्धको कार्यक्रम आयोजना गरेको छ । वडा कार्यालयको सहयोगमा सबै समुदायका महिला तथा पुरुषहरुको सहभागीता गराई सचेतना कार्यक्रम संचालन गरेको छ । सचेतना कार्यक्रमबाट वडाका जेष्ठ नागरिक तथा एकल महिला तथा पुरुषहरुलाई सम्मान गरेको छ ।
सचेतना कार्यक्रममा उपस्थित वडा अध्यक्ष कमल कार्कीले बिशेषगरी समाजमा हुने लैंगिक हिंसा हुनु मानव अधिकारको हनन् भएको बताउनु भयो । नेपालमा लैंगिक हिंसाबाट बढी प्रभावित महलिाहरु हुने गरेका छन् । यो लैंगिक असमानताको सबैभन्दा चरम रूप हो र यसले सबैका लागि दिगो विकास सुनिश्चित गर्ने समाजको क्षमतालाई कमजोर तुल्याएको छ । त्यसैले सचेतना अभियानको सही प्रयोग गर्न सकेमा यसप्रकारका सामाजिक कमजोरीहरु क्रमश हटेर जाने वडा अध्यक्ष कार्कीले बताउनु भयो ।
रामधुनी नगरमा लैङ्गिक हिंसा बिरुद्ध अभियान प्रभावकारीताका लागि रामधुनी नगरपालिकाको समनव्य रहेको छ भने सहयोगीहरु वडा कार्यलयहरु, सेभ द अर्थ सुनसरी, इटिसी नेपाल, आसमा नेपाल र इलाका प्रहरी कार्यालय पकली रहेको महिला बालबालिका शाखा रामधुनीले जनाएको छ ।
