सुनिल चौधरी
झुम्का, कार्तिक ५ । भित्रयाउने बेलाको धान डुबाएपछि रामधुनी नगरका किसान गम्भीर चिन्तामा परेका छन् । आइतबार रातिदेखि लगातार परेको पानीले धानबालीमा ठूलो क्षति पुगेको छ । वर्षभरि खान पुग्ने गरी लगाएको धान थन्काउने समयमा आएको बेमौसमी बर्षा र बाढीले धानबाली बगाएको हो।
काटेर भित्रयाउन ठिक परेको धान हक्राहा खोलाको बाढीले बगाउदा रामधुनी नगरपालिका वडा न १ भादगाउँ नयाँ टोलका किसान सिताराम चौधरी चिन्तित बनेका छन् । उनले भने,‘ धान कटाएर राखेको थिए, चामलका लागी राम्रो हुने भनेर धान खेतमा सुकाएर दौनी गर्ने आशमा थिए, आसैआशमा १३ कठ्ठामा खानको लागि लगाएको धान बाढीले बगाएर सखाप पारेको छ, खेतमा एक मुठ्ठा पनि बाँकी नरहेको बताए’ । उनले धान नष्ट भएपछि खानको लागि चामल किन्न बाध्य भएको बताए । चौधरीले भने,‘१३ कठ्ठाको धान देखाएर गएको छ, लगभग ६५ मन धान नोक्सान भयो, कोरोनाको कहरबाट भर्खर उठ्दै गरेको अवस्थामा फेरि बर्षाले ढाल्यो’ । उनले किसानहरुको लागि राज्यले केही राहत दिनुपर्ने बताए ।
रामधुनी वडा नं. १ कै उज्वल शान्ति टोल विकासका किसान देविलाल चौधरीको १० कठ्ठामा लगाएको धान सबै हिलोमा लेपिएको छ । उन्ले भने, ‘पाक्न लागेको धान हिलोमा लेपिदा सबै नष्ट भएको छ, यता डेढ कठ्ठाको काटेको धान समेत बाढीले बगाउदा नोक्सान व्यहोर्नु परेको छ,’ । बर्षभरी खान पुग्ने धान हक्राहा खोलाले बगाउदा यस बर्ष चामल किनेर खानु पर्ने बताए । चौधरीले पालन गरेको माछा समेत बगाएर लगेको छ । पोखरीमा बाढीको भंगालो पस्दा ३ कुइन्टल माछा बगेको बताए । धान र माछा नष्टहुदा रु दुई लाखको मारमा परेको बताउदै चौधरीले भने,‘आँखै अगाडि आफ्नो धान र पोखरीको माछा बिजोग भयो, हेरेर बस्न बाहेक केही गर्न सकिनँ । सम्बन्धित निकायले केही राहत देहोस् भन्ने चाहना छ ।
हक्राहा खोलाको बाढीले रामधुनी वडा नं. किसान नेपाली चौधरीको ८ कठ्ठा, महेन्द्र चौधरीको ४ कठ्ठा, मानपुर चौधरीको २ कठ्ठा , केपीलाल चौधरी २ कठ्ठागरी दुइ दर्जन कृषकको धानबालीमा क्षति पुगेको हो । हक्राहा खोलाको बाढीले बर्षेनी क्षति निमत्याउने गरेको छ । बढ्दो प्लटिङ्ग, निकासको अभाव र नगरपालिकाको उदासिन्ताले रामधुनी वडा नं. १ का किसान मारमा पर्दै आएका छन् ।
रामधुनी वडा नं. २ कुम्याही पश्चिम टोलका पशुपालन किसानको समस्या पनि उस्तै देखिएको छ । कुम्याही पश्चिम टोलमा रहेको डिसिका सुंगुर फार्मको सबै सुंगुर बगाएको छ । सेरा खोलाको बाढीले २० वटा सुंगुर बगाउदा फार्मका संचालक डिसिका राईलाई पुँजीको अभाव भएको छ । अबका दिनमा पालनकालागी पुँजी अभाव भएको बताए । सोही टोलका इश्वर चौधरीको १० कठ्ठा पोखरीको माछा सखाप भएको छ । बाढीका कारण पोखरीको माछा बगाएर सखाप भएको स्थानीय अर्जुन चौधरीले जानकारी दिए ।