राख संवाददाता
झुम्का, भाद्र १४ । झुम्का जेसीजले बालबालिका र जेष्ठनागरिक लक्षित स्वास्थ्य, सरसफाई, शिक्षा, नेतृत्व विकास लगायत सामाजिक सशक्तिकरणमा विविध कार्यक्रमहरु गर्दै आएको छ । गत बर्ष कोभिड महामारीका कारण कार्यक्रम गर्न नसकेपनि यस बर्ष बृहत सामुहिक उपस्थितीमा सप्ताह कार्यक्रम गरिरहेको छ ।
सप्ताह कार्यक्रम अन्तर्गत साँस्कृतिक तथा मौलिक पर्वहरुको प्रवद्र्धन गर्ने उधेश्यले आज सोमवार तीज र नजिकिदै गरेको जितिया पाबैन लक्षित झुम्का बजारमा साँस्कतिक कार्यक्रम सम्पन्न गरेको छ । पुर्व कृषि राज्य मन्त्री रामकुमारी चौधरीको प्रमुख आतिथ्यतामा महिला सशक्तिकरणका सेचतना सहित थारु, नेवार समुदायको पहिचान झल्किने साँस्कृतिक नृत्य प्रस्तुत गर्दै कार्यक्रम सम्पन्न गरेको हो ।
कार्यक्रममा बोल्दै पुर्व कृषि राज्य मन्त्री चौधरीले राजनीतिक, सामाजिक नेतृत्वमा महिला अग्रसर हुनु पर्ने बताउनु भयो । अहिले पनि राज्य र समाजबाट महिलाहरुमा उपेक्षाको व्यवहार रहिरहेकोले सो बिरुद्ध सामुहिक सशक्तरुपमा लाग्नु पर्ने सुझाव दिनु भयो । आउँदो निर्वाचनमा महिलाहरुको उमेदवारीमा विभेद हुन सक्ने बताउँदै यसलाई खबरदारीका साथ अडिग भएर सचेत पुर्वक उमेदवारको टिकट लिनु पर्ने उठान गर्नु भयो ।
कार्यक्रममा रामधुनी नगर प्रमुख संकरलाल चौधरी लगायतका बक्ताहरुले महिला नेतृत्व विकासको बारेमा बोल्दै तीज र जितियाको शुभकामना मन्तब्य राखेका थिए । कार्यक्रमले पर्वहरुको साँस्कृतिक पक्ष झल्किने र महिलाहरुको पर्वले महिला सशक्तिकरणमा थप बल पुगोस भन्ने चाहना सहित झुम्का जेसीजले कार्यक्रम आयोजना गरेको जेसीजका अध्यक्ष द्धारिका घिमिरेले जानकारी दिनुभयो ।
महिलाहरुले महादेवको पूजाआराधना गरी तीज मनाएको छ । आजको दिन व्रत बसी शिव–पार्वतीको पूजा, उपासना गरेमा सुख, शान्ति र परिवारको कल्याण हुने धार्मिक विश्वास छ । तीज पर्व ऋषि पञ्चमीसम्म मनाइन्छ । तृतीयाका दिन हरितालिका व्रत, चौंथीका दिन गणेश भगवान्को पूजा र पञ्चमीका दिन स्नान गरी अरुन्धतीसहित सप्तऋषिको पूजा गरी तीज समापन गरिन्छ ।
जितिया पर्वमा बालबच्चा तथा श्रीमानको दिर्घायु लगायत घरपरिवारमा सुख शान्तिको कामनागरी निराहार ब्रतबसी जितिया पर्व मनाइन्छ । यो पर्वमा श्रद्धा भक्तिका साथ शुद्ध मन,बचन र कर्मले भगवान जितमाहानको ब्रत लिने परिवारमा कुनै प्रकोप तथा अनिष्टकार संकटबाट मुक्ति मिल्छ र जिवन रक्षा हुन्छ भने गहिरो जनबिश्वास रहेको छ ।
तसर्थ यो पर्व अत्यन्त कष्टकर तर फलदायक पनि छ । परिवारजनको आरोग्य जिवनकालागी यो पर्व उत्तम मानिन्छ । यसै सनदर्भमा एउटा हसाँउने उक्ति भनाईछ “जितिया पावैन बडभारी, धियापुताके ठोईक सुतावल, अपना ख्याल भोईर थारी” यसको अर्थ हुन्छ जितिया पर्व धेरै कठिन छ, केटाकेटीलाई सुम्सुम्याएर सुताईन्छ तर आफुले दर खुब संग खाईन्छ । समग्रमा यो पर्व कठोर भएपनि जिवन उपयोगी छ ।
