चन्द्रकला चौधरी
झुम्का,पौष ११ । चिसो बढेसँगै जेष्ठनागरिकहरुमा हुने स्वास्थ्य समस्याको ध्यान राख्दै रामधुनी वडा नं. २ का जेष्ठनागरिक समितिले न्यानो कपडा वितरण गरेको छ । जाडोमा चिसोबाट बच्न र स्वस्थ्य सुरक्षाका लागि समितिले वडा अन्तर्गतका २२ जना जेष्ठनागरिकहरुलाई न्यानो कपडा वितरण गरिएको हो ।
नगर प्रमुख शंकरलाल चौधरीले न्यानो कपडा वितरण गरेको हो । कार्यक्रममा बोल्दै नगर प्रमुख चौधरीले जेष्ठनागरिकहरुको लागि नौ वटै वडामा कार्यक्रम रहेको जानकारी दिनुभयो । वडाहरुमा कार्यक्रमहरु फरकफरक गरेपनि जेष्ठनागरिकहरुका लागि नै रकम खर्च तथा कार्यक्रमहरु संचालन गरिरहेको बताउँनु भयो । राज्य सरकारले जेष्ठनागरिकहरुमा लिएको नीतिले परिवार र समाजवाट हुने अपहेलित र तिरस्कार जस्ता घटना कम भएको भन्दै रामधुनी नगरपालिकाले यस प्रति ध्यान र चासो निरन्तर दिइरहने मेयर चौधरीले धारणा ब्यक्त गर्नु भयो ।
जेष्ठनागरिक वडा समितिको आयोजनामा मंगलवारबाट जेष्ठनागरिक लक्षित निशुल्क एक हप्ते योग शिविर र स्वास्थ्य शिविर समेत गरिने आयोजकले जनाएको छ ।
कार्यक्रममा सामाजिक अभियान्ता पुष्प भट्टराईले जेष्ठनागरिकहरुमा हौसला प्रदान गर्दै सम्मानजनक रुपमा बाच्न प्रेरित गर्नु भयो । जेष्ठनागरिकहरुको लामो आन्दोलन र मागलाई राज्यले उपेक्षित गर्न नहुने धारणा राख्नु भयो । राज्य सरकारले जेष्ठनागरिकहरुलाई सम्मान, स्वाभिमान, सहभागीता, मनोरंजन, स्वास्थ्य सुरक्षाको नीतिगत सम्बोधन हुनुपर्ने भन्दै तिनै तहका सरकारले ध्यान दिनुपर्ने आवश्यक्ताका बारेमा सामाजिक अभियान्ता भट्टराईले बताउँनु भयो ।
कार्यक्रममा रामधुनी वडा नं. २ का वडा सदस्य शसिला ढुंगाना,कमलि मोची, जेष्ठनागरिक नगर समिति सदस्य मानिकचन चौधरी,बिद्यालय व्यवस्थापन समितिका फागुलाल चौधरी,योग प्रशिक्षक देवनारायण साहले जेष्ठनागरिकहरुको अधिकार र सहयोगको बारेमा धारणा ब्यक्त गर्नु भयो ।
जेष्ठनागरिक वडा समितिका कोषाध्यक्ष तुलसा कट्टेलको सभापतित्वमा न्यानो कपडा वितरण कार्यक्रम शिवनगरको थारु संग्राहलयको सभाहलमा भएको आयोजकले जानकारी दिए ।