रामधुनी खबर संवाददाता
झुम्का, असार ८ । रामधुनी नगरका दलित समुदायको समग्र क्षेत्रमा पहुँच अभिबृद्धि गर्न कार्यविधि हस्तान्तरण गर्दै अनुमोदनको माग गरेका छन् । सामाजिक विकास संजाल तथा नगरका दलित समुदायहरुको भेलाले सुक्रवार नगरस्तरिय दलित समन्वय समिति संचालन कार्यविधि २०८१ आउँदो नगर सभाबाट अनुमोदन गर्न माग गर्दै हस्तान्तरण गरेका हुन ।
रामधुनी नगरपालिकाको सहयोगमा कार्यविधि मस्यौदामा चार दिवसीय निर्माण तालिमबाट नगर उपप्रमुख तारा थापा तथा कार्यपालिका सदस्यहरुको उपस्थितीमा हस्तान्तरण गरेको उत्थान नेपालकी अध्यक्ष सृजना परियारले जानकारी दिनु भयो ।
नेपालको संविधान २०७२ को प्रस्तावना र मौलिक हकको मर्म र भावना बमोजिम दलित समुदायको हक, हित तथा अधिकार संरक्षण, सम्वद्र्धनगरी सुनिश्चितता हुने जनाएको छ । कार्य विधिले दलित समुदायको राजनीतिक, आर्थिक, सामाजिक, साँस्कृतिक एवंम शैक्षिक लगायत समग्रक्षेत्रमा पहिचान प्रतिनिधित्व र पहुँचको अभिबृद्धि हुनेछन् ।
कार्यविधिले दलित समुदायमा एकताको बल पुग्ने र उत्थान हुने भएकोले नगर सभाबाट पास गरेर जाने नगर उपप्रमुख थापाले प्रतिबद्धता जनाउनु भयो । दलित विकास कार्यविधि नगरसभाबाट पासगरी जाने प्रतिबद्धता गदै कार्यपालिका सदस्य तथा सामाजिक विकास बिषयगत समिति संयोजक शुशिला ढुंगानाले अहिले आएको २२ लाखको बजेटको योजना कार्यक्रम ढिलो भएर आएको हुनाले समावेस गर्न समस्या हुने बताउनु भयो ।
उत्थान नेपालले कार्यक्रमबाट २२ लाखको विभिन्न योजनाहरु समावेस गरेका थिए । उत्थान नेपालकी अध्यक्ष सृजना परियारले सिप विकास लगायतका उद्यमसिल तालिम सहयोगका लागि योजना तथा कार्यक्रम माग गरेका थिए ।
दलित विकास कार्यक्रम अन्तर्गत कार्यविधि निर्माण तालिम सहितको समुदायको संगठन समितिलाई कृयाशिल बनाउन कार्यक्रम संचालन गरेको महिला बालबालिका शाखा प्रमुख मोनाश्री आचार्यले बताउनुभयो । यसैगरी कार्यपालिका सदस्य सोमकुमारी सुनुवारले दलित विकास कार्यविधिबाट संगठित र उत्थान गर्नका लागि सहयोग पुग्ने धारणा ब्यक्त गर्नु भयो ।
सामाजिक विकास संजाल इटहरीका अध्यक्ष कृष्ण रसाइलीको सभापतित्वमा आयोजित कार्यक्रममा कार्यपालिका सदस्य कमली मोची, पुनम विश्वकर्मा सहितको अतिथीहरुको उपस्थिती रहेको थियो । कार्यविधिका लागि अधिवक्ता ममता चौधरी र अधिकार कर्मी अमर बराइलीले सहजिकरण गरेका थिए ।
