रामधुनी खबर संवाददाता
झुम्का, श्रवण १६ । नेपाल–भारत भूपूगोर्खा सैनिकहरुको पेन्सन सुविधाका लागि झुम्कामा दस्तावेज प्रयोजन क्याम्प सम्पन्न भएको छ । दस्तावेज प्रयोजन क्याम्पबाट ५ सय १ जनाको प्रमाणीकरण भएको भारतीय राजदुतावास पेन्सन वितरण कार्यालय धरानले जनाएको छ ।
भारत सरकारले भूतपूर्व गोर्खा सैनिक तथा तिनका आश्रित र अन्य पेन्सनहरु वितरण गर्दै आएकोमा बार्षिक रुपमा जिवित प्रमाणपत्र प्रमाणीकरण, मरुवा केस र अन्य कागजी कारवाही गर्न दस्तावेज प्रयोजन क्याम्प राखेको हो । भूतपूर्व नेपाल–भारत गोर्खा सैनिकहरु बर्षभरी ठिकठाक रहेको, जिवितै छु भन्ने जानकारी गराउन क्याम्पको उधेश्य रहेको छ ।
पेन्सन वितरणका लागि वडा वा नगरपालिकाको सिफारिस तथा वितरण कार्यलयको फारमभरी जिवितै रहेको प्रमाण पेश गरेमात्र पेन्सन वितरण हुने गरेको छ । सैनिक स्वयम आफै वा मृत्यु भए उनको श्रीमती वा उनको छोराले पाउने पेन्सनका लागि प्रमाण दिनु पर्ने प्रावधान रहेको छ ।

भारत सरकारले भूपू सैनिकहरुलाई उपलब्ध गराउने पेन्सनले आफु धेरै खुसी भएको र सन्तुष्ट रहेको चतरा निवासी रत्नमाया भट्टराई बताउनुभयो । श्रीमानको निधन पछि पाउने पारिवारिक पेन्सनका लागि रत्नमाया भट्टराईले आफु जिवितै रहेको प्रमाण पेश गर्ने क्रम्मा भारत सरकारले दिएको पेन्सनमा पहिले थोरै थियो अहिले बढाएकोमा खुसी ब्यक्त गर्नुभयो ।
बार्षिक रुपमा जिवित प्रमाणका लागि आएका भूपू सैनिक शेरबहादुर लिम्बुले झुम्कामा राखेको क्याम्पबाट सुविधा र सहुलियत भएको बताउनु भयो । इटहरीबाट आएका लिम्बुले २६ बर्ष सेवारत रही १६ बर्ष पेन्सन लिइसकेका लिम्बुले आयोजक समितिलाई धन्यवाद ब्यक्त गर्नु भएकोछ ।
क्याम्पमा भारतीय राजदुतावास पेन्सन वितरण कार्यालय धरानको प्रमुख ओआईसी मेजर भरत कनौजियाको प्रमुख आतिथ्यतामा प्रमाण प्रमाणीकरण भएको छ । भारत सरकारले पेन्सनमा उपलब्ध गराएको प्रमुख सेवा तथा परिवर्तन भएको प्रमुख पेन्सन नीतिहरुको बारेमा मेजर कनौजियाले जनाकारी दिनुभयो । जिवित प्रमाण गराइ सकेपछि बाह्र महिना मासिक खातामा पेन्सन आईरहने छन् । क्याम्पको अवसरमा पेन्सनमा उपलब्ध गराउने विभिन्न शिर्षकमा दिइने भक्ताहरुको बारेमा मेजर कनौजियाले जानकारी दिएको छ । महँगाी भक्ता दिईरहेको बारेमा उहाँले बताउनु भयो । महँगी भक्ता ५० प्रतिशतले बृद्धिगरी भारत सरकारले उपलब्ध गराइ रहेको जानकारी दिनुभयो ।

जागिर खाएर आएका सेवारत भूतपूर्व सैनिकहरुले सर्भिस पेन्सन, सेवारतको निधनपछि उनको श्रीमती र छोराले पाउने पारिवारीक पेन्सन रहेको छ । सेवारतहरुले पाउने सर्भिस पेन्सन जिवित प्रमाणपत्रमा मात्र फारम भर्दा पेन्सन प्रमाणित हुने जनाएको छ । पारिवारिक पेन्सनका लागि सेवारतको निधनपछि श्रीमतीले पाउने पेन्सनका लागि विवाह नगरेको प्रमाणपत्रमा हस्ताक्षर गर्नु पर्ने हुन्छ । अविवाहित छोरीले विवाह नगरेको प्रमाण दिनु पर्ने हुन्छ भने छोराले जिवित प्रमाण सहित अर्को कुनै जागिर नखाएको वा रु १४ हजार भन्दा माथी तलब नखाएको प्रमाण दिनुपर्ने मेजर कनौजियाले बताउनुभयो ।
पेन्शन सहित अतिरिक्त र बृद्ध भक्ता समेत पाउने उहाँले जानकारी दिनु भयो । ९५ उमेर देखि १०० बर्ष उमेरकाले पेन्शनको ५० प्रतिशत बृद्धिगरी पाउने र एक सय भन्दा माथी उमेरकाले एक सय प्रतिशत भक्ता पाउने गरेको उहाँले जानकारी गराउनु भयो ।
पेन्सनकर्ताले बसाइँ सराई गर्न सक्ने प्रावधान, भूपूगोर्खा सैनिकहरु पुनः भारतमा जागिरका लागि दरखास्त दिन सकिने लगायतका भारत सरकारबाट पाउने प्रमुख सेवाहरुको बारेमा उहाँले जानकारी दिनु भएको छ । पेन्सनबाट उपलब्ध सेवामा देखिएको समस्या तथा गुनासाहरु समेत लिएका छन् । सहभागीहरुबाट स्वास्थ्य सुविधामा समस्या, ८० बर्ष उमेर भएपनि अतिरिक्त तथा बृद्धभक्ता पाउन नसकेको समस्याहरु उठान गरेका छन् । सहभागीबाट आएका समस्याहरु केन्द्रिय कार्यालयमा राख्ने मेजर कनौजियाले प्रतिबद्धता गर्नुभएको छ ।
भूपूगोर्खा सैनिक रामधुनी नगर समितिको अध्यक्ष क्यापटेन मिठुराज अधिकारीको सभापतित्वमा आयोजित क्याम्पमा ५ सय १ जनाले प्रमाण पेशगरी प्रमाणीकरण गरिएको छ । क्याम्पको अवसरमा गरिएको कार्यक्रममा पिपिओ धरानका एसटिओ धनबहादुर क्षेत्री लगायतका अतिथीहरुले भूपू सैनिकको अवस्थाबारेमा सचेतना गरेको रामधुनी सचिव नारायण श्रेष्ठले जानकारी दिनुभयो ।
नेपाल भारत गहिरो सम्बन्धको सुरुवातको रुपमा भारतीय सेनामा गोर्खाहरुको भर्ती सन् १८१५ बाट हुँदै आएको छ । सन् १९४९ सम्म भारतीय दुतावासले लगभग ८ हजारलाई पेन्सन वितरणको व्यवस्था गरेको थियो । पेन्सन भुक्तानीका लागि काठमाण्डौँ, पोखरा र धरानमा छन् ।
गोर्खा सैनिकहरुको भूमिका प्राचीनकालदेखि नै असाधारण साहस, अनुशासन, निष्ठावान सेवाका लागि प्रख्यात रहेको क्यापटेन मिठुराज अधिकारीले उठान गर्नुभयो । भारतीय गोर्खा सैनिकले भारतमा आइपरेको विभिन्न लडाइँमा मात्र नभएर भारत राष्ट्र सामु आइपरेको हरेक विपतमा अहम् भूमिका निभाएकोे बताउनुभयो । उहाँले भूपू सैनिक रामधुनीको भवनका लागि सहयोगको अपेक्षा समेत मेजर कनौजिया समक्ष राख्नु भएको छ ।