रामधुनी खबर संवाददाता
झुम्का, भदौ २० । श्रीकृष्ण जन्माष्टमीको अवसरमा सुनसरीको रामधुनी नगरपालिकाको झुम्का बजारमा शनिवार २२औँ श्रीकृष्ण रथयात्रा सम्पन्न भएको छ । झुम्का बजारमा प्रत्येक बर्ष झै यस बर्ष पनि झुम्का उद्योग वाणिज्य संघ रामधुनीको आयोजनामा धार्मिक तथा सांस्कृतिक उत्साहका साथ रथयात्रा सम्पन्न गरिएको हो ।
“सबै मिलेर समृद्ध, शान्त र एकताबद्ध नेपाल निर्माण गरौँ” भन्ने सन्देशसहित “एकता हाम्रो शक्ति, शान्ति हाम्रो पहिचान, मानवता हाम्रो धर्म” भन्ने नाराका साथ रथयात्रा आयोजना गरिएको थियो । रथयात्रामा लाखे नाच, स्थानीय व्यवसायी, भक्तजन तथा सर्वसाधारणको सहभागिता रहेको थियो ।
झुम्केश्वर मन्दिरबाट सुरु भएको रथयात्रा झुम्का बजार परिक्रमा गर्दै लगुना चोक र शिव चोकसम्म पुगेको आयोजक समितिले जनाएको छ । रथयात्राका क्रममा भक्तजनहरूले भगवान् श्रीकृष्णको पूजा–आराधना तथा जयजयकार गर्दै धार्मिक उत्सव मनाएका छन् ।
यस वर्ष देशको वर्तमान परिस्थितिले सबैलाई संवेदनशील, संयमित र एकताबद्ध हुन आह्वान गरिरहेको भन्दै आयोजकले बाढी, पहिरो तथा अन्य प्राकृतिक विपद्का कारण ज्यान गुमाएका सम्पूर्ण नेपालीप्रति भावपूर्ण श्रद्धाञ्जली अर्पण गरेको छ । साथै, शोकसन्तप्त परिवारजनप्रति गहिरो समवेदना व्यक्त गरिएको आयोजकले जनाएको छ ।
रथयात्रामार्फत द्वेष होइन सद्भाव, अशान्ति होइन शान्ति, विभाजन होइन एकता र निराशा होइन आशाको बाटो रोजौँ भन्ने सन्देशसमेत प्रवाह गरिएको थियो।
भगवान् श्रीकृष्णको जन्मोत्सवका अवसरमा आयोजना गरिएको २२औँ श्रीकृष्ण जन्माष्टमी रथयात्रा केवल धार्मिक उत्सवमा सीमित नभई धार्मिक आस्था, सामाजिक सद्भाव, शान्ति, एकता र मानवताको साझा सन्देश प्रवाह गर्ने माध्यम बनेको झुम्का उद्योग वाणिज्य संघ रामधुनीले जनाएको छ ।
