रामधुनी खबर संवाददाता
झुम्का, भदौ २३ । जेनजी शहीद दिवसको अवसरमा सुनसरीको रामधुनी नगरपालिका–१ स्थित श्री भासि माध्यमिक विद्यालय, झुम्कामा सामूहिक सरसफाइ तथा सचेतनामूलक कार्यक्रम सम्पन्न भएको छ ।
‘सहिदको सपना, सफा, सुन्दर, शान्त नेपालको परिकल्पना’ भन्ने उद्देश्यसहित आयोजना गरिएको कार्यक्रममा विद्यार्थी, अभिभावक, शिक्षक तथा पूर्वविद्यार्थीहरूको सहभागिता रहेको थियो । कार्यक्रममा विद्यालय परिसर तथा आसपासको क्षेत्रमा सामूहिक रूपमा सरसफाइ गर्दै स्वच्छ वातावरण निर्माणका लागि सामूहिक प्रयास आवश्यक रहेको सन्देश दिइएको छ ।
जेनजी शहीदहरूको सम्झनामा भदौ २३ गतेलाई ‘जेनजी शहीद दिवस’का रूपमा स्मरण गर्दै विभिन्न कार्यक्रम आयोजना भइरहेका बेला भासि माध्यमिक विद्यालयमा भने आन्दोलनको सकारात्मक र रचनात्मक पक्षलाई जोड दिँदै सरसफाइ कार्यक्रम आयोजना गरिएको हो ।
कार्यक्रममार्फत जेनजी पुस्तालाई आगजनी, तोडफोड र विध्वंसात्मक गतिविधि भन्दा पनि समाज परिवर्तनका लागि रचनात्मक तथा सकारात्मक काममा अग्रसर हुन प्रेरित गरिएको आयोजकले जनाएको छ ।
रामधुनी नगरपालिका–१ नं. वडा कार्यालय र श्री भासि माध्यमिक विद्यालयको आयोजनामा भएको कार्यक्रममा सामूहिक सरसफाइको महत्वबारे विद्यार्थीहरूलाई जानकारी गराइएको थियो । सार्वजनिक स्थल, गाउँ–टोल, विद्यालय, बाटो तथा सडकको सरसफाइले समुदायको स्वास्थ्य, वातावरण र सभ्यतालाई प्रतिबिम्बित गर्ने भएकाले सरसफाइलाई सबैको साझा जिम्मेवारीका रूपमा लिनुपर्नेमा जोड दिइएको थियो ।
कार्यक्रममा विद्यालयका नेपाली विषयका शिक्षक जनक कोइरालाले सामूहिक सरसफाइको महत्वबारे जानकारी दिँदै अभिभावकसहितको सहभागितामा गरिने यस्ता कार्यक्रमले विद्यार्थीमा सरसफाइ प्रतिको व्यवहारिक ज्ञान र जिम्मेवारीको भावना विकास गर्ने बताउनुभयो । उहाँले विद्यालयमा मात्र नभई घर, टोल तथा सार्वजनिक स्थानको सरसफाइमा समेत विद्यार्थी आफैं अग्रसर हुन सक्ने क्षमता विकास गर्न यस्ता कार्यक्रम उपयोगी हुने धारणा व्यक्त गर्नुभयो ।
यसैगरी कार्यक्रमका संयोजक तथा रामधुनी नगरपालिका–१ का वडाध्यक्ष महेश कुमार चौधरीले जेनजी आन्दोलनलाई रचनात्मक दिशातर्फ लैजानुपर्ने आवश्यकता औँल्याउनु भयो । उहाँले आन्दोलनका क्रममा सरकारी कार्यालयलगायतका संरचनामा आगजनी र विध्वंसका घटना देखिए पनि समाज परिवर्तनका लागि रचनात्मक काम पनि गर्न सकिन्छ भन्ने अवधारणा विकास गर्न सरसफाइ कार्यक्रम आयोजना गरिएको बताउनुभयो ।
“आन्दोलन भनेको आगजनी र विध्वंस मात्र होइन, समाजमा सकारात्मक परिवर्तन ल्याउने रचनात्मक काम पनि हो भन्ने अवधारणा जेनजी पुस्तामा विकास गर्न आवश्यक छ,” उहाँले भन्नुभयो, “त्यसैलाई व्यवहारमा देखाउन सामूहिक सरसफाइ कार्यक्रम आयोजना गरेका हौँ ।”
कार्यक्रममा विद्यालयका पूर्वविद्यार्थी तथा सामाजिक अभियन्ताहरूको समेत सहभागिता रहेको थियो । नयाँ पुस्ता तथा जेनजी युवालाई सरसफाइसँगै व्यवहारिक र सामाजिक शिक्षातर्फ प्रेरित गर्ने उद्देश्यले पूर्वविद्यार्थीहरू सहभागी भएका हुन् ।
पूर्वविद्यार्थी तथा सामाजिक अभियन्ता अनिश चौधरीले विद्यार्थीलाई आधारभूत तहदेखि नै व्यवहारिक र सामाजिक जिम्मेवारीसहितको शिक्षातर्फ प्रेरित गर्न यस्ता कार्यक्रम महत्वपूर्ण हुने बताउनु भयो । उहाँले विद्यालयमा प्रदान गरिने शिक्षालाई व्यवहारसँग जोड्दै सामाजिक उत्तरदायित्व, सरसफाइ र सामूहिक कार्यप्रतिको भावना विकास गराउन कार्यक्रमले सकारात्मक सन्देश दिएको धारणा व्यक्त गर्नुभयो ।
कार्यक्रममा सहभागी विद्यार्थी, शिक्षक, अभिभावक तथा पूर्वविद्यार्थीहरूले विद्यालय परिसरमा सामूहिक रूपमा सरसफाइ गर्दै स्वच्छ, सफा र हराभरा वातावरण निर्माणका लागि आफूहरूबाटै सुरुवात गर्ने प्रतिबद्धता जनाएका छन् ।
