सुनिल चौधरी
झुम्का, भदौ १२ । कन्ट्रोल रुमबाट बिधुत सट भई अचानक आगलागीहुदा थ्रीडी म्याजिक सिनेमाहल पुर्ण क्षति भएको छ । रामधुनी नगरपालिका वडा नं. ५ झुम्का बजार स्थित रहेको सुविधा समपन्न म्याजि सिनेमा थ्रिडि मल्टिप्लेक्स सिनेमाहलमा आगलागीबाट २ करोड बराबरको क्षति भएको इलाका प्रहरी पकलीले जनाएको हो ।
आगलागी डेढ घण्टामा नियन्त्रणमा आएको थियो । इलाका प्रहरी पकलीका प्रमुख प्रकाश श्रेष्ठका अनुसार “हामीलाई बिहान ९ः०५ बजे जानकारी आएकोमा प्रहरी खटिगई बारुण यन्त्रको सहायताले बिहान १०ः३० बजे नियन्त्रणमा लिएका हौँ” । “खबर गर्ना साथ इनरुवा, इटहरी, धरान, बराहक्षेत्र, कोशी, दुहबीको बारुण यन्त्र समयमै आइपुगेकोले नियन्त्रण लिन सक्यौँ” भनेर इलाका प्रहरी पकलीका प्रमुख श्रेष्ठले बताए ।
मल्टिप्लेक्समा लागेको आगो निभाउने क्रममा संचालक प्रशुराम चौधरी र प्रहरी युवराज पोख्रेल घाईते भएका छन् । संचालक चौधरी मल्टिप्लेक्सको कार्यालयमा बिहान काम गरिरहेको अवस्थामा एका–एक इन्भटर बन्द भयो । इन्भटर बन्द भएपछि संचालक चौधरी बिधुत डिभाइडर हेर्न बाहिर निस्किदा सिनेमाहलको कन्ट्रोल रुममा आगो लागी सकेको देखे । कन्ट्रोल रुम जहाबाट फक्सिङ्ग, साउन्ड, हलको लाइट, बत्ति नियन्त्रण गर्ने हुन्छ । त्यस रुमबाट हल भित्रको बिधुत बितरण गर्ने प्रमुख स्थान र सिनेमाहलको मुटुनै मानिन्छ । कन्ट्रोल रुमबाट बिधुत डिभाइ गर्ने भएकोले त्यहीबाट आगलागी सुरु हुदा बिधुत सट भएको अनुमान गरिएको छ ।
आगो लागेको अवस्थामा सिनेमाहल भित्र रहेको फाइर कन्ट्रोल ग्यास लिएर आगो निभाउन खोज्दा झन आगो बढेर संचालक चौधरीको दुवै हाथ पोलेर घाईते भएको प्रहरीले जानकारी दिए । यसैक्रममा बारुण यन्त्रबाट आगो निभाउन सहयोग गरिरहेको अवस्थामा प्रहरी पोख्रेललाई हाथमा चोट लागेर घाईते भएको प्रहरी सुमन श्रेष्ठले बताए । आगो छिटो बढ्नुको कारण सिनेमा हल भित्र रहेको प्लाई, जिप्सन, कार्पेट, कुर्सिको फमले आगो अनियन्त्रित बनाउने कारण भएको प्रत्यक्ष खटेका प्रहरी श्रेष्ठको भनाईछ ।
तेस्रो तल्लामा रहेको मल्टिप्लेक्समा दमकल, प्रहरी, सशस्त्रको अथक प्रयासले आगलागी नियन्त्रणहुदा भुइ तल्ला र दोस्रो तल्लामा रहेको पसल क्षति हुनबाट जोगिएको छ । भुइ तल्लामा कपडा पसल, शैलुन, खाजा नास्ता पसल, वल्र्डलिंकको प्राविधक कक्ष तथा कार्यालय, दोस्रो तल्लामा सहकारी संस्था, ट्युशन सेन्टर रहेको छ ।
पाँच बर्ष अगाडी मात्र मल्टिप्लेक्स संचालनमा ल्याएको थियो । म्याजिक सिनेमा मल्टिप्लेक्स दर्शको रोजाईमा पर्दै गएको थियो । कोरोना कहरका कारण दुई बर्ष देखि भने पुर्ण रुपमै ठप्प रहेको थियो । मनोरञ्जनकालागी २ करोडको लगानीमा निर्माण गरीएको म्याजि सिनेमा थ्रिडि मल्टिप्लेक्समा डल्बि डिजिटल साउन्ड सिस्टम, पिक्चर क्वालिटी, फुल एसि, फराकिलो आरामदायी सिट सहित बिशेष सुबिधाहरु रहेको थियो । यस सिनेमा हलमा तल्लो श्रेणिमा र माथि बाल्कोनी गरी एक सय पचासओटा आरामदायी सिट रहेको थियो ।
संचालक प्रशुराम चौधरी फिलम क्षेत्रमा लामो समय देखि आबद्ध रहेका छन् । थारु भाषाका फिलमका महानायक रहेका कलाकार चौधरी खस भाषाको फिलमा समेत योग्दान दिएका छन् । पत्रकारितामा पनि अग्रज हुन् । रेडियो, टेलिभिजन, पत्रिकामा आबद्ध हुदै नेपाल टेलिभिजनबाट थारु भाषाका कार्यक्रम समेत संचालन गर्दै आएका छन् ।